Elordada statsıonarlyq tósekterdiń 41%-y bos emes

NUR-SULTAN. QazAqparat – Nur-Sultan qalasy qoǵamdyq densaýlyq saqtaý basqarmasynyń basshysy Tımýr Muratov koronavırýspen aýyryp jatqan naýqastardyń jaǵdaıy týraly málimet berdi, dep habarlaıdy QazAqparat tilshisi.

«Búginde statsıonarlardyń qýattylyǵy 634 tósek-orynǵa jetedi. Onyń ishinde 75-i – reanımatsııalyq tósek-oryn. Qazirgi tańda koronavırýsqa shaldyqqan naýqastardy emdeý úshin 7 ınfektsııalyq statsıonar jumyldyrylǵan.

Infektsııalyq statsıonarlarda 260 naýqas jatyr. 238 adamnan koronavırýs anyqtalsa, 22 patsıent pnevmonııadan emdelýde. Osylaısha júkteme 41% bolyp tur. 17 patsıent jansaqtaý bóliminde, 2 adam ókpege jasandy dem beretin apparatqa jalǵanǵan», - dedi basqarma basshysy.

Onyń málimetine súıensek, naýqastardyń arasyndaǵy 153 adam KVI-ǵa qarsy ekpe almasa, 107 adam vaktsına alǵanyna qaramastan, indet juqtyrǵan.

«Pandemııa bastalǵannan beri qalamyzda 3.3 mıllıonnan astam koronavırýs ınfektsııasynyń PTR dıagnostıkasy júrgizilgen. Ótken táýlik ishinde 586 jańa jaǵdaı anyqtaldy. Sońǵy 3 aptada ortasha eseppen táýligine 150-ge jýyq jaǵdaı tirkelip, 20 adam aýrýhanaǵa jatqyzylýda», - dedi Tımýr Muratov.

Al Nur-Sultan qalalyq sanıtarlyq-epıdemıologııalyq baqylaý departamentiniń basshysy Sarhat Beısenovanyń aıýynsha, qaladaǵy epıdemıologııalyq ahýal «sary» aımaqqa jaqyndap keledi.