Elordada sońǵy úsh jylda 10 bala terezeden qulap mert boldy

NUR-SULTAN. QazAqparat – Nur-Sultan qalalyq TJD Memlekettik órt baqylaý basqarmasynyń bastyǵy Erkin Otarǵalymuly jazǵy demalys kezinde balalardy jazataıym oqıǵadan saqtandyrý joldaryn atady, dep habarlaıdy QazAqparat tilshisi.

«Kez kelgen jaýapty ata-ana balasynyń densaýlyǵy men qaýipsizdigine alańdaıdy. Balalardy jazataıym oqıǵalardan qorǵaý úshin tek ýaıym men súıispenshilik jetkiliksiz», - dedi ol Erkin Otarǵalymuly qala ákimdiginde ótken brıfıng barysynda.

Osy rette basqarma bastyǵy ata-analardy sirińke, shyrpyny balalardyń qoly jetpeıtin jerde saqtaýǵa, balalarǵa peshti ózdiginen jaǵýǵa, gaz ben elektr qurylǵylaryn paıdalanýǵa ruqsat bermeýge, otpen oınaıtyn balalardy dereý toqtatýǵa, órt qaýipsizdigi erejesin túsindirge shaqyrdy. Sonymen qatar kishkentaı balalardy terezeleri ashyq bólmede jalǵyz qaldyrmaýǵa, bala úıde bolǵan kezde terezelerdi ashyq ustamaýǵa, shybyn-shirkeıden qorǵaýǵa arnalǵan torǵa senbeýge keńes berdi.

Jalpy, qalalyq TJD málimetinshe, sońǵy úsh jyl ishinde elordada 7 bala órtten qaıtys boldy, 14 bala jaraqat aldy. Buǵan qosa atalǵan aralyqta balalardyń terezeden qulaýynyń 46 jaǵdaıy tirkeldi. Onyń ishinde 10 bala qaıtys bolyp, 36-sy jaraqattandy.