Elordada Shómishbaı Sarıevtiń jańa kitaby tanystyrylyp, aqyn atyndaǵy zal ashyldy

NUR-SULTAN. QazAqparat – Nur-sultanda aqyn, ádebıettanýshy, ǵalym jáne Qazaqstanǵa eńbegi sińgen qaıratker Shómishbaı Sarıevtiń «Júregim – qazaq eli» atty jańa týyndysynyń tusaýkeseri ótti, dep habarlaıdy QazAqparat tilshisi.

«Shómishbaı aǵamyzdy qanatty aqyn dep beker atamaǵan. Onyń bir qanaty - aqyndyq bolsa, ekinshi qanaty - jyr shýmaqtary. Shómishbaı Sarıevtiń óleńderinde ómir men tabıǵat sulýlyǵy keremet kórkemdelgen. Sondaı-aq, aqynnyń lırıkalyq óleńderi men jyrlary tyńdarmannyń júregin tez jaýlaıdy. Shómishbaı aǵamyzdyń sózine jazylǵan ánderdi Roza Rymbaeva, Maqpal Júnisova, Nurjamal Úsenbaeva, Baǵdat Sámedınova jáne taǵy basqa elimizge tanymal ánshiler oryndap júr. Sol sııaqty talantty aqynnyń shyǵarmalary mádenıet, ádebıet salasyndaǵy túrli memlekettik syılyqtar men qurmetterge ıe», - dedi QR Mádenıet jáne sport mınıstri Aqtoty Raıymqulova.

Aqyn kitabynyń tusaýkeseri elordadaǵy Ulttyq akademııalyq kitaphanada ótti.

Jáne atalǵan sharaǵa qoǵam jáne mádenıet qaıratkerleri, aqyn-jazýshylar men aqynnyń zamandastary qatysty.

Sondaı-aq, ulttyq kitaphanada «Qos qanatty aqyn» atty Shómishbaı Sarıev esimi berilgen zal ashyldy.

«Búgin ashylǵan zaldaǵy muralar arqyly qazirgi jáne keıingi jas urpaq aqyn Shómishbaı Sarıevtiń shyǵarmashylyǵymen etene tanysa alady. Talantty aqynnyń eńbekteri jastardy shyǵarmashylyqqa baýlıtynyna senimdimin. Aǵamyzdyń mádenıet pen ádıbettegi izi men murasy ǵasyrdan ǵasyrǵa jalǵasady degen oıdamyn. Jáne osy istiń basy-qasynda júrgen jandarǵa alǵysymdy bildiremin. Aqynnyń shyǵarmalary máńgi jasaı bersin», - deıdi mınıstr.

Eske sala ketsek, elge eńbegi sińgen qaıratker Shómishbaı Sarıev bıyl aqpan aıynda dúnıeden ótti.