Elordada shaǵyn jáne orta bıneske qandaı qoldaý kórsetiledi

ASTANA. QazAqparat – Elordada shaǵyn jáne orta bıznes (ShOB) sýbektilerinde jumyspen qamtylǵandar sany artyp keledi. Bul týraly Astana qalalyq Investıtsııalar jáne kásipkerlikti damytý basqarmasy basshysynyń orynbasary Qýanysh Saparov aıtty, dep habarlaıdy QazAqparat tilshisi.

Qazirgi ýaqytta qalamyzda 223 597 shaǵyn jáne orta bıznes sýbektisi jumys isteıdi jáne olarda jumyspen qamtylǵan adamdardyń sany – 499 445. Bul elordanyń ekonomıkalyq belsendi halqynyń 72,8 paıyzyn quraıdy. Sonymen qatar ShOB salasynda jumyspen qamtylǵandar sany artqanyn atap ótkim keledi. 2022 jyldyń qorytyndysy boıynsha ShOB-tyń qala ekonomıkasyna qosqan úlesi 69,5 paıyzdy nemese 7,2 trln teńgeni quraıdy. ShOB-tyń básekege qabilettiligin arttyrý maqsatynda kásipkerlerge birqatar qoldaý is-sharalary júrgizilýde. Atap aıtqanda, Kásipkerlikti damytýdyń ulttyq jobasy aıasynda 4 baǵyt boıynsha qarjylyq qoldaý júzege asyrylady

, - dedi Qýanysh Saparov Astana qalasynyń kommýnıkatsııalar qyzmetinde ótken brıfıngte.

Onyń atap ótýinshe, birinshi baǵyt – kásipkerlerdiń nesıeleri boıynsha syıaqy mólsherlemelerin sýbsıdııalaý. Bıyl bul baǵytta ekinshi deńgeıli bankter arqyly 35,8 mlrd teńge somasyna 648 shartqa qol qoıyldy.

Ekinshi baǵyt – kásipkerlerdiń nesıelerine ishinara kepildik berý. Osy jyly 8,1 mlrd teńgege kepildik tóleý somasyna 852 shart rásimdeldi.

Úshinshi baǵyt – jetispeıtin ınfraqurylymdy júrgizý. Jetispeıtin ınfraqurylymdy júrgizý úshin bıyl 1 jobaǵa 112,8 mln teńge somasyna qoldaý kórsetildi.

Tórtinshi baǵyt – memleket tarapynan qaıtarymsyz negizde beriletin granttar.

Sonymen qatar ákimdik «Damý» qorymen birlesip, «Astana bıznes» salalyq shekteýlersiz jeńildikpen kredıtteý baǵdarlamasyn iske asyrady. Osy baǵdarlama boıynsha kásibin jańa bastaǵan kásipkerler 50 mln teńgege deıin, jumys istep jatqan kásipkerler 100 mln teńgege deıin jeńildetilgen nesıe ala alady. Bul nesıeniń syıaqy mólsherlemesi 7 paıyzdy quraıdy. 7 jylǵa deıingi merzimge beriledi. Atalǵan baǵytqa bıyl 1 mlrd teńge qarastyrylǵan

, - deıdi ol.