Elordada «Sergek» kameralarynyń sany artady

NUR-SULTAN. QazAqparat – Elordada qaýipsizdikti kúsheıtý maqsatynda beınebaqylaý kameralarynyń sany arta túsedi. Bul týraly Nur-Sultan qalasynyń tsıfrlandyrý jáne memlekettik qyzmet basqarmasynyń basshysy Botagóz Qasabek málim etti, dep habarlaıdy QazAqparat tilshisi.

«Qazir elorda aýmaǵynda 26 462 beınebaqylaý kamerasy ornatylǵan. Ótken jyldyń jeltoqsan aıynda qoǵamdyq oryndarǵa 500 jáne densaýlyq saqtaý mekemelerine 2 myńǵa jýyq kamera qoıyldy. Qaýipsizdikti qamtamasyz etý jobasy bıyl da jalǵasyn tabady. Sonymen qatar biz memlekettik-jekemenshik seriktestik týraly zańǵa ózgeris engizdik. Jańa ózgeristerge sáıkes memlekettik-jekemenshik seriktestiktermen birlesip, úı aýlalaryna «Sergek» beınebaqylaý kamerasyn ornatýdy qolǵa alyp jatyrmyz. Josparǵa sáıkes aýlalarǵa 7,5 myń beınebaqylaý kamerasyn qoıamyz», - dedi Botagóz Qasabek qalalyq máslıhattyń otyrysynda.

Onyń aıtýynsha, atalǵan jobany júzege asyrýǵa bıýdjetten qarajat talap etilmeıdi.

«Búginde ázirleý jumystary júrip jatyr. Aýla kamerasyn ornatýda polıtsııa qyzmetiniń kómegine júginip otyrmyz. Beınebaqylaý kameralary úılerdiń buryshyna, ıaǵnı adam júre qoımaıtyn jerlerge qoıylady. Qala kún sanap ósip jatyr, sáıkesinshe qaýipsizdikti kúsheıtýdi talap etedi. Bul másele ásirese jańadan salynyp jatqan aýdandarǵa qatysty», - deıdi ol.