Elordada respýblıkalyq aqsaqaldar forýmy ótip jatyr
Forýmǵa QMDB Tóraǵasy, Bas múftı Naýryzbaı qajy Taǵanuly, QR Memlekettik hatshysy Hatshylyǵy meńgerýshisiniń orynbasary Erjan Baıtiles, Aqparat jáne qoǵamdyq damý vıtse-mınıstri Serik Egizbaev jáne aqsaqaldar keńesiniń músheleri Myrzataı Joldasbekov, Ómirzaq Ozǵanbaev, Murat Jurynov, Jabal Erǵalıev syndy qoǵam qaıratkerleri men respýblıkanyń túkpir-túkpirinen belsendi aqsaqaldar men oblystardyń bas ımamdary keldi.
Jıyn qasıetti Qańtar qasiretinde mert bolǵan qazaqstandyqtardyń rýhyna Quran aıattaryn baǵyshtaýmen bastaldy.
«QMDB bıylǵy jyldy «Islam – yntymaq pen birlik dini» dep jarııalady. Osy jyl aıasyndaǵy jumysymyzdy el yntymaǵy úshin, birligi úshin júrgizetin bolamyz. Búgin múftııat ǵımaratynda «Qarııalar – el qazynasy» atty І aqsaqaldar forýmy ótip jatyr. Ár kezde aqsaqaldar elimizdiń qazynasy bolǵan, biz aqsaqalyn syılaǵan tárbıeli ulttyń urpaǵymyz. Osy qarııalardyń ómirlik tájirıbesin, bilimin jastarǵa durys tárbıe berýde, ımandylyqty damytýda, salt-dástúrimiz ben ana tilizimizdi keń nasıhattaýda paıdalanýdy josparlap otyrmyz», - dedi Naýryzbaı qajy Taǵanuly.
Onyń aıtýynsha, jyl basynda QMDB janynan Aqsaqaldar keńesi qurylǵan. Oǵan jasy alpystan asqan jáne el aldynda abyroıly-syıly qarııalar shaqyrylady. Forýmǵa da delegat retinde óńirlerden 80-ge jýyq aqsaqal kelgen.
«Sonymen qosa, qazir álemdegi ózekti máselelerdiń biri – túrli dinı aǵymdar. Qazaq halqynyń salt-dástúri árdaıym Islam dinimen sabaqtas bolyp jasap keledi. Sol qazaqtyń salt-dástúrin nasıhattaýda, dinı aǵymdardyń aldyn alýda aqsaqaldarmen birigip jumys isteımiz degen oıymyz bar. Búgingi forýmda «Qazirgi el aqsaqalardary, jalpy qazaq aqsaqalynyń tulǵalyq kelbeti qandaı?» degen taqyrypta birneshe baıandama bolady. Osy forýmnan keıin bata berý úlgileri jóninde aqsaqaldarmen jıyndar ótkizip, respýblıkalyq bata berý saıysyn ótkizý josparda bar. Qazir aqsaqaldardyń da durys bata berýi, pátýáli sózi bolýy óte qajet bolyp otyr. Búgingi forýmda osy máselelerdi aıtamyz. Barlyq usynys-pikirler jınaqtalyp, kelesi forýmdarda naqty qujattar qabyldaımyz degen nıet bar», - dedi N. Taǵanuly.