Elordada reanımatsııaǵa vaktsına almaǵandar túsip jatyr – densaýlyq saqtaý basqarmasy

NUR-SULTAN. QazAqparat – Elordada jansaqtaý bólimine KVI-ǵa qarsy vaktsına almaǵan patsıentter túsip jatyr. Statsıonarǵa jetkizilgennen keıin olardyń jaǵdaıy eki-úsh kúnde óte nasharlap ketedi. Bul týraly qalalyq qoǵamdyq densaýlyq saqtaý basqarmasynyń basshysy Tımýr Muratov aıtty, dep habarlaıdy QazAqparat qala ákimdigine silteme jasap.

«Bizdegi reanımatsııalyq tósekter 84%-ǵa toldy. Koronavırýs ınfektsııasyna qarsy ekpe almaǵan, aýyr kúıde jatqan 248 patsıent bar. Onyń ishinde 77 adam óte aýyr halde jatyr. Naýqastardyń basy-qasynda júrgendikten bul kórsetkish qatty alańdatyp otyr. Biz ótken jylǵy eń aýyr kúıge jeteıin dep qaldyq», - deıdi basqarma basshysy.

Tımýr Muratovtyń aıtýynsha aýyr kúıde jatqandar arasynda qart kisiler ǵana emes 35 jastaǵy naýqastar da bar.

«Vırýs jańa shtamdarǵa mýtatsııalanyp otyrady, olar jastar arasynda jıi tirkelýde. Qazir jastar da, tipti balalar da ınfektsııanyń aýyr kúıine ushyraı bastady. Eki-úsh kún ishinde patsıentterdiń densaýlyǵy nasharlaǵany sonshalyq jasandy tynys alý apparatynsyz ómir súre almaıtyn kúıge jetedi. Reanımatsııadaǵy barlyq patsıenttiń mundaı jaǵdaıǵa túsýiniń sebebi – vaktsınatsııalanbaýdan. Biraq olar muny kesh túsindi», - dep atap ótti T. Muratov.

Tımýr Muratov qala turǵyndaryn ýaqytynda vaktsınatsııadan ótýge, osy arqyly ózderin ınfektsııa juqtyrýdan qorǵaýǵa shaqyrdy.

«Qurmetti azamattar! Oılanyp jáne kútip otyratyn ýaqyt joq! Qazir vaktsınatsııa alý óte mańyzdy, áıtpese kesh bolýy múmkin. Bizge, ıaǵnı dárigerlerge, KVI-ge baılanysty qaıtys bolǵandar statıstıkasyn jarııalaý, týystaryna jaqyny kelmeske ketkenin aıtý ońaı emes. Ótken jyly biz pandemııany jeńýdiń barlyq jolyn izdegen edik, al qazir qolymyzda bar, ol – vaktsınatsııa. Osy arqyly ǵana biz aýrýdyń qıyn kezeńinen shyǵa alamyz», - dep qorytyndylady qalalyq densaýlyq saqtaý basqarmasynyń basshysy.