Elordada problemaly 21 turǵyn úıdiń qurylysy aıaqtaldy
«Qurylysy uzaqqa sozylǵan úılerdi aıaqtaý boıynsha júıeli jumystar júrgizýdemiz. Elorda kúnine oraı taǵy 21 turǵyn úıdiń qurylysy aıaqtaldy. Olardyń ishinde «Aqerke-2», «Jastar-4», «Talısman», «Arystan» jáne taǵy basqa turǵyn úı keshenderi bar.
Osylaısha, taǵy úsh myń úleskerdiń máselesi sheshildi. Olar kópten kútken páterin aldy. Qazir turǵyndarǵa páteriniń qujattaryn berý jáne basqa da qujattyq-protsedýralyq jumystar júrgizilip jatyr», - dedi ákim.
6 shilde kúni Altaı Kólginov «Aqerke-2» turǵyn úı keshenin baryp kórgen. Bul úıdiń qurylysy jyldar boıy toqtap turdy. Qazir turǵyn úı kesheniniń qańqasy aıaqtalyp, terezeler, esikter, lıftiler ornatyldy. Jobalyq-smetalyq qujattama daıyndalyp, úıdiń qasbeti boıynsha jumystar júrgizildi. «Úlken problemalardyń biri garajdardy buzý boldy. Garajdardy satyp alý boıynsha qajet jumystar júrgizildi, bul ınjenerlik jelilerdi úıge jetkizýge múmkindik berdi. Bul turǵyn úı kesheninde 150-den astam otbasy bar», - dedi shahar basshysy.
Ákimniń málimetine súıensek, elordada 2019 jyldyń jazynda qurylysy uzaqqa sozylǵan 150-den astam úı boldy. 2019 jyldyń jarty jyldyǵynda 13 kóppáterli turǵyn úı kesheni salynyp, paıdalanýǵa berildi. 2020 jyly 20 úı aıaqtaldy.
«Bıyl elordada problemaly taǵy 57 kóppáterli turǵyn úı kesheniniń qurylysyn aıaqtaýdy josparlap otyrmyz. Bul 7 myńnan astam úleskerdiń máselesi sheshiledi degen sóz.
Úlestik qurylystyń árbir nysany boıynsha qadamdyq is-sharalar jospary bar», — dep jazdy elorda ákimi A.Kólginov.