Elordada polıtsııa mas júrgizýshini kóligine oq atyp toqtatty
7 sáýir kúni saǵat 03:52-de polıtsııa qyzmetkerleri Táýelsizdik dańǵyly boıymen kele jatyp, jol qozǵalysy erejesin óreskel buzǵan Citroën kóligin baıqady. Kólikte memlekettik tirkeý nómiri de bolmaǵan.
Polıtseıler kólikti toqtatpaq boldy. Alaıda júrgizýshi toqtaýdyń ornyna, kerisinshe jyldamdyqty qosty. Osydan soń patrýldik polıtsııa jasaqtary kólikti qýa jónelgen.
Júrgizýshi polıtsııa qyzmetkerleriniń kólikti toqtatý týraly zańdy talabyn oryndamaı, qashyp otyryp Kóktal shaǵynaýdanyna qaraı buryldy. Patrýldikter kólikti Tilendıev dańǵylynda ony qorshap alady, alaıda júrgizýshi zańsyz áreketin toqtatpaı, polıtsııa kóligine qarsy qozǵaldy.
Jol qozǵalysynyń basqa qatysýshylaryna qaýip tóndirmeý úshin polıtsııa qyzmetkerleri qyzmettik qarý qoldanyp, kólik dóńgelekterin jaryp toqtatqan. Qarý qoldanýdan eshkim zardap shekken joq.
Kólik júrgizgen 21 jastaǵy er adam qamaýǵa alyndy. Saraptama qorytyndysy onyń mas kúıinde bolǵanyn kórsetti. Tekserý barysynda kólikten reseılik memlekettik tirkeý nómiri tabyldy. Jas er adamnyń buǵan deıin ákimshilik jaýapkershilikke tartylǵany anyqtaldy. Tártip buzýshyǵa qatysty birden 19 ákimshilik hattama toltyryldy.
Kólik aıyppul turaǵyna qoıyldy. Mamandandyrylǵan aýdanaralyq ákimshilik sotynyń qaýlysymen tártip buzýshy 20 táýlikke qamaýǵa alyndy, sonymen qatar 7 jylǵa kólik júrgizý quqyǵynan aıyryldy.