Elordada polıtsııa ınternet arqyly qylmys jasady degen kúdikpen 14 adamdy ustady
Baspasóz qyzmetiniń málimetterine qaraǵanda, aqparattyq tehnologııalardy paıdalana otyryp jasalǵan qylmystyq quqyq buzýshylyqtarmen kúres tıimdiligin arttyrý maqsatynda Nur-Sultan qalasynyń aýmaǵynda «Anti-Fraud» jedel aldyn alý sharasy uıymdastyrylǵan.
Ol úshin departamenttiń eń tájirıbeli qyzmetkerlerinen arnaıy top qurylyp, úsh kúnde tártip saqshylary ınternet jelisinde 50-ge jýyq qylmystyń betin ashqan. Internet-alaıaqtyqtyń 29 faktisi jáne 7 ınternet arqyly jasalǵan urlyq anyqtaldy.
Іzdestirý sharalary barysynda polıtsııa ınternet jelisinde qylmys jasaǵan 14 kúdiktini qolǵa túsirdi.
40 jastaǵy er adam ustaldy. Onyń onlaın alaıaqtyqtyń 40-tan astam faktisine qatysy bar ekeni dáleldendi. Er adam aqparatty zańsyz jınaý arqyly QR azamattarynyń jeke málimetterin alyp, olardy paıdalana otyryp, aqparattyq tehnologııalardyń kómegimen nesıe rásimdeıtin bolǵan. Qazirgi ýaqytta er adam qamaýǵa alynyp, tergeý amaldary júrgizilýde.
Sondaı-aq, 20 tamyzda polıtsııa azamattarǵa bankterden úlken mólsherde nesıe alýǵa ýáde bergen 31 jastaǵy elorda turǵynyn ustady. Bankterden nesıe ala almaǵan kóptegen qala turǵyndary Internettegi deldaldarǵa júginedi. Bes qala turǵynyn aldaǵan kúdikti de dál osyndaı deldal bolyp shyqty. Alaıaq óziniń «qyzmeti» úshin aldyn-ala tólem talap etip, qiwi ámııanyna aqsha aýdartyp, jelidegi jarnamalary men telefon nómirlerin óshirip tastaǵan. Qazirgi tańda osy áreket boıynsha sotqa deıingi tergeý júrip jatyr.