Elordada polıtsııa ǵımaratynyń terezesinen qashpaq bolǵan buzaqy ustalyp qaldy

NUR-SULTAN. QazAqparat – Elordada polıtsııa ǵımaratynyń terezesi arqyly qashpaq bolǵan buzaqy ustalyp qaldy, dep habarlaıdy QazAqparat.

Instagram-daǵy Astana sergek paraqshasynda jarııalanǵan vıdeoda bir adamnyń ekinshi qabat terezesinen salbyrap turǵany túsirilgen. Vıdeoda onyń qolynan polıtsııa qyzmetkeri ustap turǵanyn baıqaýǵa bolady. Osy oqıǵa qatysty Nur-Sultan qalalyq polıtsııa departamenti túsinikteme berip, oqıǵanyń Esil aýdandyq polıtsııa basqarmasynda oryn alǵanyn rastady.

«Osy jyldyń 22 qyrkúıeginde polıtsııa qyzmetkerleri buzaqylyq faktisimen 32 jastaǵy er adamdy ustap, Esil aýdandyq polıtsııa basqarmasyna jetkizgen bolatyn. Ol polıtsııa ǵımaratynyń ekinshi qabatyndaǵy terezesinen qashyp ketpek boldy. Qashý áreketiniń joly kesildi. Buzaqylyq is-áreket faktisi boıynsha sotqa deıingi tergeý júrgizilip jatyr», - dedi polıtsııa departamentinen.