Elordada pnevmonııamen aýyratyndar 40 paıyzǵa azaıdy

NUR-SULTAN. QazAqparat – Elordada 5 shildeden bastap engizilgen karantın sharalary men ambýlatorııalyq emdeýdi kúsheıtý nátıjesinde pnevmonııamen aýrýhanaǵa túskender sany 40,5% – 1 348-den 793-ke deıin azaıdy, dep habarlaıdy QazAqparat qala ákimdigine silteme jasap.

Qalada koronavırýs statsıonarlaryna túsken naýqas sany 50,3%-ǵa azaıdy.

«Karantın sharalary, emhanalarda ambýlatorııalyq emdeýdi kúsheıtý jáne qala turǵyndarynyń sanıtarııa normalaryn qatań saqtaýy densaýlyq saqtaý júıesine, dárigerlerge júktemeni aıtarlyqtaı tómendetti. Jedel járdem stansasyna qońyraý sany eki esege jýyq astam azaıdy – táýligine 2 400-den 1 129-ǵa deıin (52,3%) tústi. Sonyń ishinde KVI boıynsha – kúnine 350-den 112-ge deıin. Karantınge deıin, koronavırýstyń aýyr dárejesimen naýqastar medıtsına mekemelerine birinen soń biri túsip jatatyn. Bul – dárigerlerge moraldyq turǵydan óte aýyr tıdi, olar sharshady. Densaýlyq saqtaý mamandary ár naýqas úshin sońyna deıin kúresti. Qazir aýyr naýqastar sany azaıdy. Eki kún buryn dárigerlerimiz ókpesi 100%, 90% qabynǵan naýqastardy emdep shyǵardy. Azamattardan karantın alynyp tastalǵannan keıin de ınfektsııanyń aldyn alý úshin sanıtarııa normalaryn qatań saqtaýdy suraımyz», – dedi qalalyq densaýlyq saqtaý basqarmasy basshysynyń mindetin atqarýshy Álııa Rústemova.

Osylaısha, KVI-den emdelip shyqqandar sany 67 paıyzǵa jetti. 9 494 naýqastyń 6 607-i saýyǵyp shyqty. Tósek-oryn júktemesi 90%-dan 47%-ǵa azaıdy.