Elordada pırotehnıkany zańsyz satý faktisi tirkelip, 700-den astam buıym tárkilendi

NUR-SULTAN. QazAqparat – Jańa jyl qarsańynda elordalyqtarǵa pırotehnıka buıymdaryn qaýipsiz qoldanýdyń erejesi túsindirilip jatyr, dep habarlaıdy QazAqparat tilshisi.

«15 jeltoqsan men 12 qańtar (2022 jyl) aralyǵynda elordada «Pırotehnıka» jedel profılaktıkalyq sharasy ótip jatyr. Maqsat – pırotehnıkalyq buıymdardy qoldanǵan kezde qaýipsizdikti saqtaý. Atalǵan shara bastalǵaly qala aýmaǵynan pırotehnıkany zańsyz satýdyń 7 faktisi tirkelip, nátıjesinde 700-den astam pırotehnıkalyq buıym tárkilendi. Ózderińiz bilesizder, pırotehnıkany durys qoldanbasa onyń arty órtke ulasýy nemese adamnyń densaýlyǵyna zııan keltirýi ábden múmkin. Ondaı jaǵdaılar bar», - dedi Nur-Sultan qalasy polıtsııa departamentiniń erekshe tapsyrma jónindegi aǵa ınspektory Azamat Ámen elorda ákimdiginde onlaın ótken baspasóz máslıhatynda.

Polıtsııa ókili pırotehnıkany qoldanýǵa saq bolýǵa jáne ony balalarǵa bermeýge shaqyrdy.

«Pırotehnıkalyq buıymdardy qoldanýdaǵy qarapaıym erejeler adamnyń ómirin qutqarýy múmkin. Sondyqtan qarapaıym erejelerdi saqtaýǵa shaqyramyz. Jalpy otshashýdy satýǵa arnaıy ruqsaty bar dúkennen alǵan abzal. Pırotehnıkanyń qoldaný merzimi bolatynyn da umytpaıyq. Taǵy bir mańyzdy jaıt, satýshy pırotehnıkany qoldaný týraly keńes berýge mindetti. Sonymen qatar tutynýshy satyp alýshydan polıtsııa departamentiniń ruqsatynyń baryn suraýǵa quqyly», - deıdi ol.

Buǵan deıin qalalyq TJD ókili elordada jańajyldyq kesh ótkizetin meıramhana ıelerine qaýipsizdik erejesin túsindirdi.