Elordada Pfizer vaktsınasyn qansha adam aldy

NUR-SULTAN. QazAqparat – Elordada Pfizer vaktsınasyn egý bastalǵan birinshi kúnde 339 adam vaktsınatsııadan ótti. Bul jaıynda Nur-Sultan qalalyq qoǵamdyq densaýlyq saqtaý basqarmasynan málim etti, dep habarlaıdy QazAqparat tilshisi.

Vedomstvo málimetinshe, ekpe alǵandardyń ishinde 14 júkti áıel (júktiliktiń 16-36 aptasy), 133 bala emizetin ana jáne 192 jasóspirim bar.

«Keshe Nur-Sultan osy preparatpen vaktsınalaýǵa jatatyn azamattarǵa ekpe salýdy bastady. Alǵashqy kúni júkti áıelder, bala emizetin analar, jasóspirimder arasynan ekpe alǵysy keletinder kóp boldy. Oqýshylar, stýdentter ata-analarymen birge kelip, belsendilik tanytty. Sonymen qatar, vaktsınatsııa qala mektepterinde jaqsy júrgizildi. Barlyǵy medıtsınalyq tekserýden ótip, vaktsına alýǵa dárigerdiń ruqsatyn aldy, árqaısysyna túsinikteme berildi», - dedi basqarma basshysynyń orynbasary Álııa Rústemova.

Qalalyq densaýlyq saqtaý basqarmasynyń aqparatyna sáıkes, jasóspirimder arasynda ekpe alǵandardyń 127-si 16-17 jas aralyǵyndaǵy bala.

Esterińizge sala keteıik, atalǵan sanattaǵy adamdardy vaktsınatsııalaý tek medıtsınalyq uıymdardyń jáne qalalyq mektepterdiń medıtsınalyq pýnktterinde júrgiziledi.

Qala boıynsha barlyǵy 5 myń júkti áıel, laktatsııa kezeńinde 28 myń áıel jáne 63 myń bala Pfizer preparatymen vaktsınatsııalanýy kerek.