Elordada otalyp turǵan kólikti aıdap áketken eki jigit ustaldy

NUR-SULTAN. QazAqparat – Nur-Sultan qalasy polıtsııa departamentiniń «Almaty» aýdany PB qylmystyq polıtsııa qyzmetkerleri elorda aýmaǵynda kólikti aıdap áketý kúdigine ilingen eki azamatty ustady. Bul týraly QazAqparat Nur-Sultan qalasynyń polıtsııa departamentine silteme jasap habarlaıdy.

Polıtsııaǵa qalanyń turǵyny kelip, 15 naýryz túngi saǵat 02:50-de Kúıshi Dına kóshesinde «Lada Vaz 2114» kóligin belgisiz bireýlerdiń aıdap áketkenin aıtqan.

Kólik ıesi otalyp turǵan kóligin birneshe mınýtqa qaldyryp ketken bolatyn.

Tergeý barysynda 22 jáne 21 jastaǵy eki jas azamattyń aldyn ala oılastyrǵan josparmen jumys istegeni belgili boldy.

Qaskúnemder otalyp turyp, ıesiz qalǵan kólikterdi ańdyp júrip, teris oıyn solaı júzege asyrǵan.

JBO-nyń beınebaqylaý taspalary urlanǵan kóliktiń Qabanbaı batyr dańǵylynda memlekettik tirkeý nómirinsiz Qorǵaljyn tasjolyna ketip bara jatqanyn anyqtady.

Polıtsııa jasaǵy kúdiktilerdi ustady. Atalǵan faktimen qylmystyq is qozǵaldy. Kúdiktilerdiń elorda aýmaǵynda osyǵan uqsas qylmystarǵa qatysy anyqtalý ústinde.

Nur-Sultan qalasynyń polıtsııa departamenti azamattardy qyraǵy bolyp, kóliginen shyqqanda onyń esik-terezeleriniń durys jabylǵanyn tekserýdi suraıdy.

Kóliktiń urlanýyn boldyrmaý jáne qaýipsizdigin qamtamasyz etý maqsatynda polıtseıler kólik ıelerine ony otalǵan kúıde qaldyryp ketpeýin, dabyl júıesin ornatýdy, kólikterdi kúzetiletin avtoturaqtarǵa qoıyp ketýdi keńes etedi.

Zańǵa qaıshy áreketterge tap bolǵan azamattar polıtsııanyń 102 nómirine habarlasa alady.