Elordada órtten 10 adam qutqaryldy

NUR-SULTAN. QazAqparat – Elordada 4-qabatty úıden órt shyqty. Bul jaıynda Nur-Sultan qalalyq tótenshe jaǵdaılar departamentinen málim etti, dep habarlaıdy QazAqparat tilshisi.

«21 mamyr kúni elordalyq órt sóndirýshiler Jeńis dańǵyly boıyndaǵy 57 úıden órt shyqqany týraly habarlama aldy. Oqıǵa ornynan jetken kezde 4-qabatty turǵyn úıdegi páterlerdiń biriniń as bólmesindegi zattar men jıhazdardyń órtenip jatqany anyqtaldy. Qyzyl jalyn saǵat 19:08-de oqshaýlanyp, odan keıin úsh mınýttyń ishinde tolyqtaı sóndirildi. Qyzyl jalyndy sóndirý barysynda órt sóndirýshiler joǵary qabattaǵy 10 adamdy qutqarý maskasynyń kómegimen qaýipsiz jerge shyǵardy. Onyń ishinde bir bala ortasha dárejede ıis tıip ýlanyp, aýrýhanaǵa jatqyzyldy. Órttiń shyǵýyna aldyn ala málimetterge qaraǵanda, ydys jýýǵa arnalǵan mashınanyń elektr symdarynyń qysqa tuıyqtalýy sebep bolýy múmkin», - dep atap ótedi departamentten.

Vedomstvo málimetinshe, órtti sóndirýge Nur-Sultan qalalyq TJD jeke quramynyń 28 mamany men 6 tehnıkasy, polıtsııa departamentiniń, jedel járdem qyzmetiniń qyzmetkerleri jumyldyrylǵan.