Elordada óńirlerdiń aýylsharýashylyq jármeńkeleri bastaldy

NUR-SULTAN. QazAqparat – Erteń elordada óńirlerdiń aýylsharýashylyq jármeńkeleri bastalady. Bul týraly Nur-Sultan qalalyq ınvestıtsııalar jáne kásipkerlikti damytý basqarmasy bastyǵynyń orynbasary Qýanysh Saparov aıtty, dep habarlaıdy QazAqparat tilshisi.

«Konstıtýtsııa kúni qarsańynda, 27-28 tamyz kúnderi jylda ótkiziletin aýyl sharýashylyǵy jármeńkesin bastaǵaly otyrmyz. Osy kúnderi Túrkistan oblysynyń kásipkerleri qalaǵa 500 tonnadan astam ónimderin ákeledi. Jalpy, Túrkistan oblysynan 70-ten astam kásipkerdiń qatysýy josparlanǵan. Ónimder elordadaǵy baǵadan 15-20 paıyz tómen. Aýyl sharýashylyǵy ónimderin óndirýshiler tikeleı astanaǵa ákelip, qala turǵyndaryna satady. Jármeńke «Astana-Arena» stadıonynyń avtoturaq alańynda ótedi», - dedi Qýanysh Saparov elorda ákimdiginiń baspasóz qyzmeti alańynda ótken brıfıngide.

Onyń atap ótýinshe, elordadaǵy jármeńke 12 qarashaǵa deıin jalǵasady jáne oǵan elimizdiń barlyq óńiri qatysady. 3-4 qyrkúıekte Jambyl oblysynyń aýyl sharýashylyǵy taýarlaryn óndirýshileriniń jármeńkesi uıymdastyrylady.

Brıfıngige qatysqan Túrkistan oblystyq aýyl sharýashylyǵy basqarmasy bastyǵynyń orynbasary Nurbol Bekmuratovtyń dereginshe, óńirde 7 aıda 339 mlrd teńgeniń ónimin óndirgen.

«Jármeńkege Túrkistan oblysynan 70-ten astam aýyl sharýashylyǵy taýarlaryn óndirýshileri 40-qa jýyq júk kóligimen keldi. Eki kúnge sozylatyn jármeńkege 478 mln teńgege 500 tonnadan astam ónim ákelindi. Onyń ishinde 165 tonna et, 70 tonna baqsha ónimderi, 100 tonnadan astam kortop, kókónister, sonymen qatar sút ónimderi, shujyq, jumyrtqa bar», - dedi ol.