Elordada Nur Otan partııasyna saltanatty qabyldaý ótti
Partııanyń baspasóz qyzmetiniń málimetinshe, «Nur Otan» partııasyna búgin barlyǵy 1,5 myńǵa jýyq azamat kirgen.
Partııanyń jańa múshelerine partııa bıletterin tabystaı otyryp, «Nur Otan» Tóraǵasynyń birinshi orynbasary Baýyrjan Baıbek Qazaqstan Respýblıkasynyń Tuńǵysh Prezıdenti kúni – Elbasynyń memleketimizdiń qalyptasýy men damýyndaǵy erekshe rólin aıshyqtaýdyń belgisi ekenin atap ótti.
«Elbasynyń muqalmas erik-jigeri men qaısar qajyrlyǵy bizdiń bárimiz úshin de, bolashaq urpaq úshin de árdaıym Otanǵa qyzmet etýdiń teńdessiz úlgisi bolady. Tuńǵysh Prezıdentimiz Nursultan Ábishuly Nazarbaevtyń sheshimimen elimiz úshin asa mańyzdy irgeli ister júzege asty: shekaramyz shegendelip, jańa elordamyz boı túzedi. Semeı polıgonyn jabý, etnosaralyq kelisimdi qamtamasyz etý, naryqtyq ekonomıka men zamanaýı ınfraqurylymdy qalyptastyrý, demografııalyq daǵdarysty eńserý sııaqty jáne basqa da kóptegen máseleler sheshildi», – dedi Baýyrjan Baıbek.
Onyń aıtýynsha, elimizdiń Tuńǵysh Prezıdenti Nursultan Nazarbaevtyń jáne halyqtyń qoldaýynyń arqasynda «Nur Otan» partııasy ýaqyt talabyna sáıkes ómirlik mańyzdy reformalar júrgizip otyrǵan elimizdiń jetekshi saıası kúshine aınaldy.
«Elbasy atap ótkendeı, «Nur Otan» partııasy árqashan negizgi úsh qaǵıdany basshylyqqa alady jáne ony berik ustanady. Bul – jaýapkershilik, birlik jáne ortaq maqsatqa degen adaldyq. Biz aldaǵy saılaý naýqanyna tyńǵylyqty daıyndaldyq. Ár óńir, qala jáne aýdandaǵy áleýmettik-ekonomıkalyq ahýaldy taldaý negizinde saılaýaldy baǵdarlamalardyń 216 jobasy ázirlendi. Memleket basshysy Qasym-Jomart Kemeluly Toqaevtyń «Halyq únine qulaq asatyn memleket» tujyrymdamasyn iske asyra otyryp, praımerız barysynda halyqtan 20 myńǵa jýyq talap-tilek jınaldy. Olardyń basym bóligi partııanyń aldaǵy bes jyldyq «Ózgerister joly: ár azamatqa laıyqty ómir!» saılaýaldy baǵdarlamasyna engizildi. Alǵa qoıǵan maqsattar men mindetterdi sapaly júzege asyrý partııanyń árbir múshesine baılanysty», – dep atap ótti Baýyrjan Baıbek.
Búgin «Nur Otan» partııasynyń qataryna kirgenderdiń arasynda travmatolog-dáriger, joǵary sanatty ortoped Oljas Bekarysov bar. Ol pandemııa kezinde adamdarǵa qol ushyn sozyp, el ıgiligi úshin jumys isteıtinderdiń qatarynda bolǵysy keletindikten de partııa qataryn tolyqtyrǵanyn atap ótti.
Al zańger Anar Qusaıynovanyń aıtýynsha, onyń partııaǵa kirý sebebi adamdarǵa kómektesýge degen nıetimen baılanysty.
«2017 jyly ulym zańsyz sottalyp, qıyn jaǵdaıǵa tap boldy. Qanshama jerge júginsem de nátıje bolmady. Sodan keıin «Nur Otan» partııasynyń qoǵamdyq qabyldaý bólmesinen kómek suradym. Partııa qoldaýymen uıymdastyrylǵan kóptegen kezdesýlerdiń nátıjesinde is qaıta qolǵa alyndy. Sondyqtan da men partııaǵa sanaly túrde, shyn yqylasymmen múshe boldym. Osy jerde ózim sııaqty azamattardyń ómirin jaqsy jaqqa ózgertkisi keletin murattas jandardy kezdestirdim. Meniń adam quqyqtary salasyndaǵy kópjyldyq tájirıbem de kádege jaraıdy dep úmittenemin», – dedi ol.
«Men Qaraǵandy oblysynyń týmasymyn. 23 jastamyn, ákem men atam sııaqty shahter bolyp jumys isteımin. Shahter bolyp eńbek etý barlyq ýaqytta da kúrdeli jáne qaýipti kásip boldy. Biz eńbek pen ómirdiń naqty qunyn bilemiz, sondaı-aq, ádemi sózderge emes, naqty isterge ǵana senemiz. Praımerız kezinde men Shahtınsk qalasyna arnalǵan partııa baǵdarlamasymen tanystym. Men osy iske aralasyp, óz qalama paıdasy tıetin azamat bolǵym keledi. Sondyqtan da partııaǵa kirýdi jón kórdim», – dedi Baýyrjan Aıtmaǵambetov.
Sondaı-aq, «Bizbirgemiz» respýblıkalyq aktsııasynyń belsendi qatysýshysy, ınjener Danııar Dúkenbaev, Kókshetaý qalasynyń týmasy, ǵalym, «agronomııa» mamandyǵy boıynsha PHD doktory Marden Baıdalın, mádenıet ókili Ashat Máden, Aqmola oblysy Zerendi aýylynyń sportshysy Svetlana Prokopeva, zań konsýltanttary palatasynyń múshesi Janar Dosetova, Kókshetaý qalasynan ınformatıka pániniń muǵalimi Nııaz Talǵatuly jáne Shymkent qalasynyń jastar isi jónindegi ýnıversıtet komıtetiniń tóraıymy Aıdana Aınabek partııa bıletterin aldy.