Elordada neırohırýrgter segizkózge erekshe ota jasap, qaterli isikti alyp tastady

ASTANA. QazAqparat - Elordada ulttyq neırohırýrgııa ortalyǵynyń dárigerleri segizkóz órimine ota jasap, erekshe eptilikpen quıymshaqqa ósken qaterli isikti alyp tastady. Quny 5 mln teńgege jýyqtaıtyn bul ota MÁMS júıesi boıynsha jasaldy, dep habarlaıdy QazAqparat Áleýmettik medıtsınalyq saqtandyrý qory fılıalyna silteme jasap.

Dárigerlerdiń aıtýynsha, bul erekshe otadan keıin naýqas emin-erkin júrip-tura alady.

Buryn mundaı jaǵdaıda segizkózdi nerv júıelerimen qosa kesip tastaıtyn.

ıAǵnı isikti alýdyń jalǵyz joly osy bolǵan. Alaıda ondaı otadan keıin naýqas arbaǵa tańylyp qalatyn.

Qala turǵyny Gaýhar Ahmetova ótken jyldan beri beli aýyryp, barlyq tekserýden ótedi. Quıymshaq tusyndaǵy shydatpas dertten aıyǵýdyń túrli amalyn qarastyrady.

Túrkııa, Izraıl elderindegi dárigerlerge de habarlasady.

Ondaǵy dárigerler ota quny 50 myń eýro turatynyn, biraq otadan keıin júrip ketetinine eshqandaı kepildik bere almaıtyndaryn aıtqan.

Oılana kele ol medıtsınalyq kómek alý úshin ulttyq neırohırýrgııa ortalyǵynyń dárigerlerine júginedi.

Naýqasty jan-jaqty tekserýden ótkizgen mamandar ota jasaý joldaryn oılastyrady.

«Segizkózdiń ishinde kishi-úlken dáretti, aıaqtyń qımyl-qozǵalysyn rettep turatyn nerv júıkeleri ornalasqan. Al ol túgel alynsa naýqasqa óte aýyr bolady. Biz jasaǵan otanyń ereksheligi - isikti segizkózimen alyp tastap, ishindegi nerv júıelerin saqtap qaldyq», - dep túsindirdi neırohırýrg-dáriger Talǵat Kerimbaev.

Aıta keteıik, MÁMS boıynsha jasalǵan bul otanyń quny – 5 mln teńgege jýyq.

«Myqty mamandar bizde de bar ekenine kózim jetti. Shynymdy aıtsam, bulaı júrip ketem dep oılamadym. Ózimizdiń otandyq dárigerlerdiń eptiligine, biliktiligine bas ıdim. Aıtar alǵysym sheksiz»- deıdi Gaýhar Ahmetova.

Ulttyq neırohırýrgııa ortalyǵynyń dárigerleri bul otany taǵy birneshe adamǵa jasap, aıaǵynan turǵyzǵan.

Endi ǵylymı maqalalar jazyp jarııalaý arqyly bul ota jasaý ádisin álemdik deńgeıge jetkizýdi kózdep otyr.

Jalpy, ortalyqta jylyna 4 myńnan astam ota jasalady, onyń ishinde omyrtqaǵa jasalatyn eń kúrdeli operatsııalar da bar.