Elordada naýryz aıynda mindetti medsaqtandyrýǵa túsken qarjy 2,3 mlrd teńgeden asty

NUR-SULTAN. QazAqparat - «Elordalyqtar 2020 jyldyń 1-31 naýryzy aralyǵynda medıtsınalyq saqtandyrý úshin 2,3 mlrd teńgeden asa jarna aýdardy», – dep habarlaıdy QazAqparat «Áleýmettik medıtsınalyq saqtandyrý qory» KEAQ Nur-Sultan qalasy boıynsha fılıalynyń baspasóz qyzmetine silteme jasap.

Júıe iske qosylǵan 2017 jyldyń 1 shildesi men 2020 jyldyń 31 naýryzy aralyǵyndaǵy jınaqtalǵan jarnanyń jalpy somasy 371 mlrd teńgeden asady.

«Medıtsınalyq saqtandyrý qoryna jarna aýdarýda elordalyq jumys berýshiler kósh basynda deýge bolady. Nur-Sultan qalasynyń turǵyndary 2020 jyldyń 1-31 naýryzy aralyǵynda medıtsınalyq saqtandyrý úshin 2,3 mlrd teńgeden asa jarna aýdarǵan. Olardyń jarnalary men aýdarymdarynyń qomaqty bóligi – 1,5 mlrd teńgeden astamy jumys berýshilerdiń aýdarymdary, al 8,1 mln teńgeden astamy – jeke kásipkerlerden túsken jarnalar», - deıdi «Áleýmettik medıtsınalyq saqtandyrý qory» KEAQ Nur-Sultan qalasy boıynsha fılıalynyń dırektory Aıdar Seıitqazınov.

Áleýmettik medıtsınalyq saqtandyrý qoryna túsken barlyq mindetti áleýmettik medıtsınalyq saqtandyrý jarnalary, ıaǵnı jınaqtalǵan qarjy Ulttyq bankpen arada jasalǵan senimgerlik basqarý týraly kelisimshartqa sáıkes, Ulttyq bankte saqtalyp, Mindetti áleýmettik medıtsınalyq saqtandyrý paketi sheńberindegi qyzmetter aqysyn tóleýge jumsalady.