Elordada nasybaı óndiretin jerasty tsehtar áshkerelendi

<p>ASTANA. KAZINFORM &ndash; Elordanyń barlyq aýdandarynda 18 naýryzdan bastap veıp pen nasybaıdyń zańsyz taralýy men qoldanylýyn anyqtaý maqsatynda reıdter júrgizilip jatyr. Nátıjesinde birqatar zańsyz is-áreketter belgili boldy. Bul týraly Astana ákimdiginiń resmı saıty jazdy.</p>

«Reıd bastalǵannan beri elordanyń bes aýdanynda 700-ge jýyq saýda núkteleri tekserildi. Polıtsııa departamentiniń qyzmetkerleri aýdan ákimdikterimen birlesip, shekpeıtin temeki ónimderin, onyń ishinde nasybaı óndirisi boıynsha jerasty tsehtaryn satýdyń 145 faktisin anyqtady. Astana boıynsha quny 20 mln teńgeden asatyn 4 tonna nasvaı tárkilendi. Tárkilengen barlyq ónim joıyldy», - delingen habarlamada.

Reıdtik is-sharalar aptalyǵynda Nura aýdanynda 90-ǵa jýyq dúken tekserildi.

«18-26 naýryz aralyǵynda Nura aýdany ákimdigi apparatynyń kásipkerlik bóliminiń qyzmetkerleri aýdandyq polıtsııa basqarmasymen birlesip reıd júrgizdi. Іs-shara barysynda Asfendııarov, Anet baba, Syǵanaq, R.Baǵlanova, Uly dala jáne Isataı batyr kóshelerinde ornalasqan nasybaıdy zańsyz satý boıynsha 87 dúkende profılaktıkalyq túsiniktemeler júrgizildi. Sondaı-aq 6 dúkenge 25 aılyq eseptik kórsetkish mólsherinde aıyppul salyndy. Búgingi tańda 20-ǵa jýyq dúkenge tekserý júrgizilip, satýshylarǵa túsiniktemeler berildi. Reıdter 31 naýryzǵa deıin jalǵasady», — dedi Nura aýdany ákimdiginiń kásipkerlik bóliminiń bas mamany Bektemir Joljasqajıev.

Baıqońyr aýdanynda saýda núktelerinde jedel-profılaktıkalyq is-sharalar júrgizilip jatyr. 

Aýdan polıtsııasynyń ýchaskelik ınspektorynyń aıtýynsha, shekpeıtin temeki ónimderin zańsyz satatyn saýda núktelerine jáne veıp satýshylarǵa ákimshilik hattama men 25 aılyq eseptik kórsetkish nemese 92 300 teńge kóleminde aıyppul salynady.

Saryarqa aýdanynda jedel-profılaktıkalyq is-sharalar barysynda 23 kásipkerlik nysany zertteldi. Onyń ishinde 2 dúken ıesine aıyppul salyndy. Sonymen qatar aýdan boıynsha 60 kelige jýyq nasybaı tárkilendi.

Elordanyń saýda núkteleri boıynsha reıdter kún saıyn ótedi.

Eske sala keteıik, jaqynda Parlament veıpterge tyıym salatyn zańdy bekitkenin jazǵan bolatynbyz. Sondaı-aq, depýtat Jarqynbek Amantaıuly nasybaı sııaqty zııandy zattar satatyn saýda oryndaryn baqylaýdy surap, mektep oqýshylary esh kedergisiz nasybaı atyp júrgenine alańdaýshylyq bildirgen edi.