Elordada muqtaj otbasylarǵa et taratyldy
Nur-Sultan qalasy ákimdigi jáne «Astana jastary» JRO volonterleri jáne avtovolonterleriniń uıymdastyrýmen áleýmettik az qamtylǵan otbasylarǵa jáne muqtaj jandarǵa et taratyldy.
«Qurban aıt merekesine oraı Nur-Sultan qalasynyń belsendi jastary, qala turǵyndary, aýdandyq ákimdikterdiń, qalalyq basqarmalardyń ókilderi birige otyryp, úsh kún boıy muqtaj azamattarǵa et taratýdy uıymdastyryp jatyrmyz. Búgingi is-sharaǵa volonterler men avtovolonterler qatysyp otyr. Olardyń jalpy sany 500-den asady. Bul is-shara ákimdiktiń qoldaýymen sońǵy bes jylda turaqty túrde júzege asyrylyp kele jatyr», – dedi «Jastar saıasaty máseleleri basqarmasy» MM bólim basshysy. Aıan Ermentaev.
Bul is-sharanyń basty maqsat – qasıetti merekede musylmandyq paryzdy oryndaý, muqtaj jandarǵa kómektesý. Atalǵan ıgi istiń basy-qasynda júrgen jandardyń biri – volonter Damır Aıtymov.
«Qurban aıt merekesine oraılastyrylyp ótkizip jatqan bul is-sharanyń saýaby mol. Qurbandyqqa shalǵan mal etiniń bir bóligin áleýmettik az qamtylǵan otbasylar men muqtaj jandarǵa taratyp berip jatyrmyz. Kóńil-kúıimiz keremet. Osynda ıgi iske atsalysqanyma qýanyshtymyn», - deıdi volonter Damır Aıtymov.
Aıta keteıik, elordalyq volonterler buǵan deıingi merekelerde de muqtaj otbasylarǵa azyq-túlik sebetin taratyp, saýapty iske muryndyq bolyp júr.
Esterińizge sala keteıik, Nur-Sultanda bekitilgen mal soıý oryndarynda qurbandyq shalý saǵat 8.00-den 18.00-ge deıin ótedi. Sondaı-aq muny «QURBAN2022.kz» Qazaqstan musylmandary dinı basqarmasynyń saıty arqyly da onlaın jasaýǵa bolady. Mal soıý úshin myna elordada 7 oryn belgilengen bolatyn.
«Qurban aıt» merekesi kúnderi halyqqa qurbandyq shalý jáne taǵy basqa da dinı máseleler boıynsha aqparat alý úshin táýlik boıy «109» Call-center jumys isteıdi.