Elordada Muhtar Áýezovke eskertkish qoıyldy

<p>ASTANA. KAZINFORM - 28 qyrkúıekte elordamyzda uly jazýshy, dramatýrg jáne ǵalym Muhtar Áýezovke arnalǵan eskertkishtiń saltanatty ashylý rásimi ótti, dep habarlaıdy Aqordanyń baspasóz qyzmeti.&nbsp;</p>

Eskertkishti Qazaqstan Respýblıkasynyń Memlekettik keńesshisi Erlan Qarın jáne jazýshynyń týysy Dıar Qonaev ashty.

Foto: Aqorda

Erlan Qarın Memleket basshysy Qasym-Jomart Toqaevtyń quttyqtaý hatyn oqyp berdi. Prezıdenttiń quttyqtaý hatynda: «Muhtar Áýezov – ult rýhanııatynda aıryqsha orny bar uly jazýshy. Ol shyǵarmalarynda halqymyzdyń bitim-bolmysy men tynys-tirshiligin sheber sýrettedi. Qalamgerdiń teńdessiz týyndylarynan ana tilimizdiń baılyǵy men tól órkenıetimizdiń tereńdigi aıqyn kórinedi. Shyn máninde, jurtymyzdyń jan dúnıesin bilgisi kelgen adam eń aldymen Áýezovti oqýy kerek», – dep kórsetilgen.

Sonymen qatar is-sharaǵa zııaly qaýym ókilderi, jazýshylar, mádenıet salasynyń qaıratkerleri, qoǵamdyq keńes músheleri, qalalyq máslıhat depýtattary jáne Muhtar Áýezovtiń týystary qatysty.

Músinshiler Aıdos Búrkitbaev pen Tımýr Ermuhametov jasaǵan sáýlet óneriniń týyndysy Astana qalasyndaǵy Qalıbek Qýanyshbaev atyndaǵy Qazaq ulttyq mýzykalyq drama teatrynyń aldynda ornatyldy.