Elordada mıtıng ótetin oryndar belgilendi

NUR-SULTAN. QazAqparat - Nur-Sultan qalasynyń máslıhaty beıbit jıyn ótkizý úshin aıqyndaǵan jalpyǵa ortaq oryndardy nemese júrý marshrýtyn belgiledi. Qujat Ashyq normatıvtik-quqyqtyq aktiler portalynda jarııa talqyǵa usynyldy, dep habarlaıdy QazAqparat tilshisi.

Atalǵan qujatqa sáıkes, elordada beıbit jıyndar men sherý ótkizý úshin 4 arnaıy oryn usynylyp otyr.

Birinshisi - aýmaǵy 4 380 sharshy metrdi quraıtyn, 1000 adam sııatyn Sh.Qudaıberdiuly dańǵyly men A.Pýshkın kóshesi qıylysyndaǵy saıabaq.

Ekinshisi - myń adam syıatyn, aýmaǵy 2 064 sharshy metrdi quraıtyn «Astanalyq tsırk» janyndaǵy alań.

Úshinshisi - aýmaǵy 1 695 sharshy metr bolatyn Jeńis, Abaı dańǵyly, T.Bıgeldınov jáne Jeltoqsan kósheleri tórtburyshyndaǵy jazǵy alań. Bul jerge 500 adam erkin syıady.

Sherý ótkizýge arnalǵan tórtinshi baǵyttyń uzyndyǵy - 2055 metr. Baǵyt Abaı dańǵyly men Sembınov kóshelerinen, Jazýshylar alleıasynan bastap, Qudaıberdiuly dańǵyly men A.Pýshkın kóshesine deıin jalǵasady.

Sherýge myń adamǵa deıin qatysa alady.