Elordada mereke kúnderi aýyl sharýashylyǵy ónimderiniń jármeńkesi ótedi

NUR-SULTAN. QazAqparat – Elordada 16-19 jeltoqsan aralyǵynda aýyl sharýashylyǵy ónimderiniń jármeńkesi uıymdastyrylady, dep habarlaıdy QazAqparat qala ákimdiginiń resmı saıtyna silteme jasap.

Kelýshiler tańǵy 8-den keshki beske deıin qajetti ónimderdi ala alady. Óz ónimderin Aqmola, Pavlodar, Qaraǵandy, Shyǵys Qazaqstan oblystarynyń taýar óndirýshileri, sondaı-aq astanalyq agrarshylar usynady.

Jármeńkede azyq-túlik ónimderiniń barlyq túrleri satylady: sút, bakaleıa, shujyq, un, balyq jáne t. b.

Kelýshiler sıyr etin shamamen 2000 tg/kg, jylqy etin - 2200 tg/kg, qazy, jaıa - 2500 tg/kg satyp ala alady.

Aıta ketý kerek, jármeńke sanıtarlyq normalardy saqtaı otyryp ótkiziledi. Kelýshiler men qatysýshylar betperde kııýi kerek, qol gıgıenasy men áleýmettik qashyqtyqty saqtaýy kerek.

Budan ári jármeńke apta saıyn ár senbi jáne jeksenbi kúnderi myna meken-jaıda ótedi: Prıgorodnyı turǵyn alaby, Arnasaı kóshesi, 109 ǵımarat.