Elordada mektep tapshylyǵy máselesi qashan sheshiledi

ASTANA. QazAqparat – Qalalyq bilim basqarmasynyń basshysy Qasymhan Senǵazıev elorda mektepterindegi oryn jetispeýshiligi jáne úsh aýysymmen oqý máselesi qashan oń sheshimin tabatynyn aıtty, dep habarlaıdy QazAqparat tilshisi.

«Elordada bilim berý salasyndaǵy problemalardyń biri – oqýshy oryndarynyń jetispeýi. Qalada 164 mektep bar, onda 236 myń oqýshy bilim alyp jatyr. Degenmen, jyl sanap oqýshylardyń sany artyp keledi. Búginde 27 myńnan astam ótinish qabyldandy, demek oqýshylardyń sany 250 myńnan asyp túsedi degen sóz. Demek, ótken jylmen salystyrǵanda 20 myńǵa artyq. Qaladaǵy 18 mektepte bala tolyp ketken jáne 8 mektep úsh aýysymda oqytady. Osy máselelerdi sheshý jolynda 15 700 oqýshyǵa arnalǵan 11 mektep salynyp jatyr. Onyń tórteýi osy oqý jylynda paıdalanýǵa beriledi», - dedi Qasymhan Senǵazıev qalalyq máslıhat otyrysynda.

Sondaı-aq, basqarma basshysy «Jaıly mektep» jobasy aıasynda elordada 24 mektep salynatyny týraly aıtty.

«Búginde 15 mekteptiń qurylysy bastaldy. Qalǵany boıynsha konkýrstyq jumystar júrgizilip jatyr. Atalǵan jumys tolyǵymen 2024-2025 jyldary aıaqtalady. Sol kezde oryn jetispeýshilik jáne úsh aýysymda oqý máseleleri sheshiledi», - deıdi ol.

Buǵan deıin elordada 15 qosymsha bilim berý nysany ashylatyny týraly habarlaǵan edik.