Elordada mektep ashanalaryn qarjylandyrý somasyn kóterý usynyldy

NUR-SULTAN. QazAqparat – Nur-Sultan qalasy sanıtarlyq-epıdemıologııalyq baqylaý departamenti basshysynyń orynbasary Aıgúl Shaǵaltaeva qaladaǵy mektepterde tamaqtandyrýǵa qarajat jetkiliksiz ekenin aıtty, dep habarlaıdy QazAqparat tilshisi.

«Tamaqtandyrý quny 449 teńge (mektepte bir balany kúnine tamaqtandyrý quny) ekenin eskersek, bul soma ósip kele jatqan balany qajetti dárýmendermen qamtamasyz ete almaıdy. Sońǵy eki jylda azyq-túliktiń qymbattaýyn nazarǵa alsaq, bólinetin qarajattyń eń tómen kórsetkishi Nur-Sultan qalasynda baıqalyp otyr», - dedi A. Shaǵaltaeva qalalyq máslıhattaǵy turaqty komıssııanyń otyrysynda.

Aıta keteıik, elordada bastaýysh synyp oqýshylary 100 paıyz tegin ystyq tamaqpen qamtylǵan.

Óz kezeginde Nur-Sultan qalasynyń Bilim basqarmasy» MM basshysy Qasymhan Senǵazyev balany kúnine bir ret tamaqtandyrýǵa qarastyrylǵan 449 teńge quny talaptarǵa sáıkes kelmeıtinin aıtty.

«Osyǵan baılanysty as máziri talaptarǵa sáıkes kelmeı jatady. Bul óz kezeginde tamaqtaný sapasyna áser etip otyr. Tıisti esepteýlerdi júrgizdik. Qazirgi azyq-túlik baǵasyna qaraı, bir balany tamaqtandyrý quny 750 teńgeni qurap tur. Óńirler boıynsha salystyrsaq, Almaty qalasynda 700 teńge bólinip otyr», - dedi Q. Senǵazyev.

Onyń aıtýynsha, eger atalǵan soma 750 teńgege jetkizilse, qala boıynsha 15 mlrd teńge qarajat jumsalýy kerek bolady.

Budan buryn habarlanǵandaı, Nur-Sultan qalasynyń Bilim basqarmasy basshysy balabaqshalarda tamaqtandyrý tarıfine qatysty pikir bildirdi.

A. Shaǵaltaeva qaladaǵy mektepterge azyq-túlik jetkizetinderdi tekserý nátıjesi týraly aıtyp berdi.