Elordada «Máńgilik el ıdeıasy: tarıhy men bolashaǵy» atty konferentsııa ótip jatyr
Jıyndy ashqan QR Tuńǵysh Prezıdenti - Elbasy kitaphanasy dırektorynyń birinshi orynbasary Ámirhan Rahymjanovtyń aıtýynsha, bul konferentsııa - kitaphanada ótkiziletin dástúrli jáne óte mańyzdy is-sharalardyń biri.
«Biz nebir tar jol, taıǵaq keshýden, neshe túrli synnan, qııamettiń qyl kópirinen birlik pen yntymaqtyń arqasynda aman ótken elmiz. Sondyqtan barymyzdy baǵalap, kıemizdi qasterleı biletin, ultymyzdyń baǵyna týǵan alyptarymyzdy ardaqtap, qadirin túsinetin halyqpyz. Shırek ǵasyr ishinde asqar asýlar men bıik belesterdi baǵyndyryp, eńseli elge aınalýymyz Elbasynyń kemeńgerligi men kóregendiginiń arqasynda ekenin ár qazaqstandyq jaqsy biledi. Elbasynyń jyl saıynǵy Joldaýlaryn asyǵa kútip, strategııalyq baǵdarlamalary men jahandyq bastamalarynyń iske asyrylýyna ár ujym, ár azamat óziniń qal-qaderinshe atsalysýǵa tyrysady», - dedi ol.
Sebebi, onyń paıymynsha, elimiz jetken tabystar men bolashaq josparlar barlyq ýaqytta da Tuńǵysh Prezıdentimiz, Elbasy Nursultan Nazarbaevtyń esimimen baılanysty.
«Biz Prezıdentimizdiń «Máńgilik el» jolyndaǵy dana saıasatynyń arqasynda búginde damyǵan elder qataryna jettik. Halyqaralyq jáne álemdik deńgeıde abyroıly, bedeldi memleket atandyq. Keń baıtaq qazaq jeri tatýlyqtyń úlgisine aınalyp, damýdyń qazaqstandyq joly qalyptasty. Endi egemen elimiz damýdyń jańa kezeńine aıaq basty», - dedi Á.Rahymjanov.
Qazaqstannyń úshinshi jańǵyrýy - qoǵamnyń rýhanı jańarýy mindetteri mánmátininde ótkizilip jatqan konferentsııa jumysyna tanymal otandyq ǵalymdar, doktoranttar men magıstranttar qatysýda. Olar Máńgilik el ıdeıasymen baılanysty jumystardyń tarıhı, ekonomıkalyq, saıası, fılosofııalyq, mádenı, áleýmettik, quqyqtyq jáne basqa da qyrlaryn talqylap jatyr. Shara qorytyndysynda «Qazaqstan joly: máńgilik el» monografııasyn shyǵarý josparlanǵan.