Elordada MÁMS aıasynda balalarǵa jasalatyn em, otanyń 95%-y tegin

NUR-SULTAN. QazAqparat – Nur-Sultan qalasyndaǵy №2 qalalyq kópbeıindi balalar aýrýhanasynda mindetti áleýmettik medıtsınalyq saqtandyrý (MÁMS) júıesi aıasynda kórsetiletin em jáne otanyń 95 paıyzy tegin. Bul týraly atalǵan mekemeniń bas dárigeriniń orynbasary Medet Nuǵmanov málim etti, dep habarlaıdy QazAqparat tilshisi.

«Bizdiń aýrýhanaǵa kúnine jedel járdemmen 700-ge jýyq bala túsedi. Olardyń aýrýhanaǵa túsý sebebi ártúrli. Ajyratyp qarasaq, sol balalardyń 300-den astamy túrli jaraqat alǵan. 100-150 bala pedıatrııa jáne hırýrgııa boıynsha júginedi. Qandaı jaǵdaı bolmasyn kishkentaı patsıentterdi qabyldap, em kórsetemiz. Sol sııaqty qajetti qural-jabdyq pen mamandar bar. Balalar arasyndaǵy aýrý túrlerine kelsek, maýsymǵa qaraı bólinedi. Jazda kóbinese túrli jaraqat alý kóbeıedi. Sebebi balalar kanıkýlda bos ýaqyty kóp. Kúzde jemis-jıdek, kókónistiń pisetin maýsymy bolǵandyqtan ish jáne ishek aýrýlary etek jaıady», - dedi Medet Nuǵmanov BAQ ókilderine arnalǵan baspasóz týry barysynda.

Sondaı-aq, mamannyń aıtýynsha, qara sýyq túse bastaǵan kezde balalardyń arasynda tumaý jıi tirkeledi.

«Qazirgi jaǵdaıǵa kelsek, balalardyń arasynda soqyrishek aýrýy jıi baıqalyp otyr. Oǵan sebep COVID-19 indeti bolýy da múmkin. Bizdiń aýrýhanada balalarǵa ota jasaý ekige bólinedi. Josparly jáne jedel ota. Jospar boıynsha kúnine balalarǵa 15-ten 30-ǵa deıin ota jasalady. Al jedel túrde 10, 15 nemese 20 ota jasalýy múmkin», - deıdi ol.

Onyń dereginshe, atalǵan aýrýhanada MÁMS aıasynda balalarǵa jasalatyn em, otanyń 95 paıyzy tegin.

Aıta keteıik, 1 maýsym halyqaralyq balalardy qorǵaý kúnine oraı Nur-Sultan qalasy boıynsha áleýmettik medıtsınalyq saqtandyrý qorynyń uıymdastyrýymen baspasóz týry ótti.

Uıymdastyrýshylardyń málimetinshe, búginde elordada «Balalarǵa kúlki syıla!» aktsııasy ótip jatyr.

Atalǵan shara aıasynda balalardyń tisin tekserý jáne emdeý boıynsha «Stomatologııa» oqý-klınıkalyq ortalyǵy, «Asyl-Aı Stom» JShS, «M32» JShS, «Tumar», «Er-Stom» taǵy sol sııaqty stomatologııalyq klınıkalar óz qyzmetin usynatyndyǵy aıtyldy.