Elordada mádenıet jáne óner salasynyń qyzmetkerleri revaktsına jasady
«Vaktsına jáne revaktsına alý arqyly biz ujymdyq jáne jalpy qoǵamdyq ımmýnıtetti qalyptastyrýǵa úles qosamyz. Ekpe alý ár adamnyń densaýlyǵy úshin mańyzdy. Qaıta vaktsına alýda óner qyzmetkerleri nege belsendilik tanytyp jatyr degenge kelsek. Biz mádenıet uıymdarynyń qyzmeti qaıta jandanǵanyn qalaımyz, óıtkeni tolyqqandy jumys istegimiz keledi. Kórermenmen tikeleı júzdesip, ónerimizben qýantqsaq deımiz. Teatrlar men kontsert zaldar qalyń jurtty kútýde. Kópshilikpen ótetin sharalardy saǵyndyq. Ózim buǵan deıin Hayat vaktsınasyn saldyrǵam, endi revaktsınaǵa Sinopharm-dy alǵym kelip otyr», - dedi qalalyq mádenıet basqarmasynyń basshysy Sanat Shapashov tilshilerge suhbat bere turyp.
Onyń aıtýynsha, elordalyq óner salasynyń qyzmetkerleri revaktsınany belsendi túrde alyp jatyr.
«Men koronavırýspen aýyryp shyqtym. Qýanyshqa oraı, vaktsına alýymnyń arqasynda indet jeńil ótti. Bas-aıaǵy bir aptanyń ishinde jazylyp shyqtym. Vaktsına alǵanda da eshqandaı keri áser baıqalmady. Іndetpen qoǵam bolyp kúressek ony jeńetinimizge senimdimin», - deıdi ol.
Osylaısha qalalyq №2 emhanada óner salasynda eńbek etetin 50-ge jýyq astanalyq qyzmetker revaktsına saldyrdy.
«Biz óner adamdary barsha halyqty vaktsına alýǵa jáne revaktsınatsııadan ótýge shaqyramyz. Sebebi ujymdyq ımmýnıtetti qalyptastyrmaı koronavırýsty jeńe almaımyz. Jaǵdaı rettelse bizdiń jumysymyzda qalypqa keledi. Gastrolge shyǵýǵa múmkindik týady. Іndetpen kúresýde ár adamnyń úlesi mańyzdy. Sondaı-aq, jeke bas qaýipsizdigi úshin de vaktsına alǵan abzal. Men Spýtnık V vaktsınasyn alǵam, revaktsınaǵa da sol Spýtnık V nemese QazVac-ty tańdaǵym kelip otyr», - dedi M.Gorkıı atyndaǵy memlekettik orys drama teatrynyń dırektory Aıbolat Jaýdyr.