Elordada qylmys jasaý deńgeıi 5,5%-ǵa tómendedi

NUR-SULTAN. QazAqparat – Nur-Sultan qalasynda qylmys jasaýdyń deńgeıi birshama tómendegen. Bul týraly qalalyq polıtsııa departamentiniń basshysy Marat Tólebaev málim etti, dep habarlaıdy QazAqparat tilshisi.

«Ótken jyldyń qorytyndysy boıynsha qylmystyń barlyq túrlerin ashý deńgeıi jaqsarǵan. Búginde elorda turǵyndary men qala qonaqtary úshin qolaıly ári qaýipsiz jaǵdaı jasalyp, qajetti sharalar qabyldanyp jatyr. Qylmyspen kúreste oń betalys baıqalady. Jyl basynan beri qylmys jasaý deńgeıi 5,5% tómendegen. Aldaǵy ýaqytta bul kórsetkish óse túsedi degen boljam bar», - dedi Marat Tólebaev elorda jurtymen kezdesý barysynda.

Sondaı-aq, vedomstvo basshysy elordada esirtkimen kúres máselesiniń basty nazarda ekenin jetkizdi.

Qalalyq polıtsııa departamentiniń málimetine sáıkes, osy kúnge deıin zańsyz aınalymnan 169 keli esirtki tárkilendi. Onyń ishinde 2,3 kelisi - «geroın».

Odan bólek, esirtki ázirleýmen aınalysatyn 3 zerthana qyzmetiniń joly kesilip, 5 keliden astam «sıntetıka» tárkilendi.

Aıta ketsek, búgin Nur-Sultan qalasy polıtsııa departamentiniń basshysy, polıtsııa general-maıory Marat Tólebaev «Zoom» platformasynda halyq aldynda esep berdi.

Shara barysynda elorda turǵyndary tolǵandyrǵan saýaldaryn qoıyp, ótinish, usynystaryn jetkizdi.