Elordada qylmys sanynyń artýy baıqalady
«Jalpy, jedel jaǵdaı turaqty. Statıstıkaǵa sáıkes, qylmystardy tirkeýdiń shamaly ósýi baıqalady. Sonymen qatar, bul qylmystyq jaǵdaıdyń asqynýymen baılanysty emes. Qylmys kórsetkishi ótken jyldyń deńgeıinde qalyp otyr. Qabyldanǵan is-sharalar kisi óltirý, zorlaý, tonaý, qaraqshylyq jáne buzaqylyq sııaqty qylmystardyń sanyn azaıtýǵa múmkindik berdi. Kisi óltirý, densaýlyqqa aýyr zııan keltirý, zorlaý, tonaý, urlyq, kólik urlyǵy jáne ınternet-alaıaqtyqtyń ashylýy jaqsardy», - dedi ol elorda máslıhatynyń otyrysynda.
Marat Tólebaevtyń dereginshe, 146 esirtki qylmysy anyqtaldy. Onyń ishinde 107 satý faktisi áshkerelendi. Esirtkiniń 200-den astam túri tárkilendi. Bul 2021 jylmen salystyrǵanda jeti ese kóp. Tórt esirtki zerthanasynyń qyzmeti toqtatyldy, 66 esirtki saıty buǵattaldy. Uzaq merzimdi arnaıy operatsııany júrgizý barysynda turaqty arna joıyldy. Elorda aýmaǵynda esirtki jetkizýdi jáne satýdy júzege asyratyn uıymdasqan qylmystyq toptyń áreketine jol berilmedi. Uıymdastyrýshy, esirtkini negizgi jetkizýshi jáne Jambyl qylmystyq tobynyń bes múshesi ustaldy. Zańsyz aınalymnan 37 kg gashısh tárkilendi.
«Qabyldanǵan is-sharalar jetkiliksiz ekenin túsinemiz. Qaladaǵy esirtki jaǵdaıy kúrdeli bolyp otyr. Osy baǵyttaǵy jumystyń tıimdiligin arttyrýǵa bar kúshimizdi salamyz. Qazirgi ýaqytta Іshki ister mınıstrligi Memleket basshysynyń tapsyrmasymen nashaqorlyqqa jáne esirtki bıznesine qarsy kúres jónindegi jańa keshendi jospar ázirlenýde. Onda josparlanǵan is-sharalardy iske asyrýǵa qatysatyn barlyq sýbektilerdiń jaýapkershiligin arttyrý kózdelgen», - dedi elordanyń bas polıtseıi.