Elordada Quzyrettilik ortalyǵynyń jumysy tanystyryldy

NUR-SULTAN. QazAqparat - Nur-Sultan qalasynyń Bilim basqarmasy «Jas maman» jobasy aıasynda Qoǵamdyq tamaqtaný jáne servıs kolledji janyndaǵy quzyrettilik ortalyǵynyń jumysyn tanystyrdy, dep habarlaıdy qala ákimdiginiń resmı saıty.

Jıyn barysynda kolledj túlekteriniń qatysýymen molekýlıarlyq asúıdiń gastronomııalyq jıyntyǵy boıynsha aspazdyq stýdııa alańy, keıterıng (catering) praktıkalyq modýli - meıramhana servısi boıynsha marketıngtiń naryqtyq segmenti jáne bar isi boıynsha «art-kofeni zamanaýı usyný» sheberlik-synyptary tanystyryldy.

Bul alańdar 2020 jyly bastalǵan «Jas maman» jobasy aıasynda zamanaýı tehnıkalyq jabdyqtarmen jabdyqtalǵan.

Aıta keteıik, «Jas maman» baǵdarlamasy «100/200» qaǵıdaty boıynsha jumyspen qamtý salasyn, tehnıkalyq jáne kásiptik bilim berý júıesin jaqsartýǵa baǵyttalǵan. Basqasha aıtqanda, mamandardy daıarlaý 200 jańǵyrtylǵan oqý oryndarynyń bazasynda 100 neǵurlym suranysqa ıe mamandyqtar boıynsha júzege asyrylady.

Respýblıkalyq joba aıasynda 2020 jyly 3 astanalyq kolledj («ASTANA POLYTECHNIC» joǵary kolledji, Qoǵamdyq tamaqtaný jáne servıs kolledji, Kásiptik-tehnıkalyq kolledj) jańǵyrtyldy, 5 sheberhana jáne 5 orta arnaıy oqý oryndarynyń zerthanalary jańǵyrtyldy. Bıyl 5 kolledjdi (Qurylys-tehnıkalyq, Tehnıkalyq, Tehnologııalyq, Servıs jáne týrızm, Kólik jáne kommýnıkatsııalar joǵary kolledji) zamanaýı jabdyqtarmen jaraqtandyrý josparlanyp otyr.