Elordada qurylysy uzaqqa sozylǵan turǵyn úıler qashan tapsyrylatyny naqtylandy

ASTANA. QazAqparat - Elordadaǵy Qalalyq orta sapasy jáne baqylaý basqarmasynyń basshysy Dáýlet Dosqulov úleskerler qarajatyna salynǵan turǵyn úı qurylysynyń jaǵdaıy týraly aıtyp berdi, dep habarlaıdy QazAqparat tilshisi.

«Problemasy bar úlestik qurylys nysandarynyń paıda bolýynyń ekinshi tolqyny aıasynda elordada 52 nysanda 150 úı tirkelgen edi. Bul turǵyda 16 myńnan astam úlesker aldanyp qaldy. Memlekettik baǵdarlama aıasynda 2019 jyldan qazirge deıingi kezeńde 120 turǵyn úıdiń qurylysy aıaqtalyp, 14 myńnan astam otbasy baspanaly boldy. Qalǵan 30 úı 2023 jyly jáne 2024 jyldyń basynda aıaqtalady dep josparlanǵan», - dedi D. Dosqulov Astana qalasy Qoǵamdyq keńesiniń otyrysynda.

Onyń aıtýynsha, qazir qala ákimdigi janyndaǵy vedomstvoaralyq komıssııa aıasynda qaralǵan 10-nan astam nysan basqarmanyń baqylaýynda tur. Bul nysandar ınvestorlardy tartý arqyly salynyp jatyr.

«Jaqynda qala ákimi atalǵan nysandardyń barlyǵyn aralap, jaýapty adamdarǵa tıisti tapsyrmalar berdi. Bul nysandardy aıaqtaý jumystary jalǵasyp keledi», - dedi basqarma basshysy.

Budan buryn habarlanǵandaı, taıaýda Astanada 300-den astam úlesker birneshe jyldan beri kútip júrgen páterin aldy.