Elordada qurylys kompanııasyna aldanǵan 300-ge jýyq úlesker polıtsııaǵa júgindi

NUR-SULTAN. QazAqparat - Nur-Sultan qalasynyń polıtsııa departamenti «Expolis Invest VM» JShS basshylyǵynyń «Royal EXPO apartments» JTK qurylysy kezinde alaıaqtyq jasaý faktisi boıynsha qylmystyq isti tergep jatyr, dep habarlaıdy QazAqparat.

Qazirgi kezde polıtsııaǵa 280 jábirlenýshi ótinish jazǵan. Sot aldyndaǵy tergep-tekserý barysynda «Expolis Invest VM» JShS áreketinen elimizdiń túrli aımaqtarynda turatyn 300-den astam adam japa shekkeni anyqtaldy.

Oqıǵanyń mán-jaıyn jan-jaqty, tolyq ári obektıvti tergeý maqsatynda Nur-Sultan qalasynyń polıtsııa departamenti kompanııa áreketinen zardap shekken úleskerlerdi tergeý basqarmasynyń myna telefon nómirine habarlasýyn ótinedi: 71-62-85, 8-775-968-77-34.

Osyǵan uqsas jaǵdaılardy boldyrmaý maqsatynda qurylysshylarmen úlestik qurylys týraly qujattardy toltyrý kezinde kelesi aspektilerge nazar aýdarýdy suraımyz:

- jobalaýshy men salýshy kompanııanyń naqty zańdy mekenjaıy týraly málimetter;

- kompanııanyń memlekettik tirkeýden ótýin rastaıtyn qujattar;

- kompanııanyń quryltaıshylary, sondaı-aq jobalaýshylardyń quryltaıshylary týraly málimetter;

- quzyrly organdardyń lıtsenzııasynyń bolýy, onda qurylys júrgizý úshin jeke tulǵalardyń aqshalaı qarajatyn tartý ruqsaty kórsetilýi tıis;

- kompanııanyń qurylys júrgiziletin jerge quqyǵyn rastaıtyn qujattar;

- MSQBB nysandy salýǵa ruqsatynyń bolýy;

- qurylys kezeńderi men onyń aıaqtalý merzimderi týraly málimetter;

- salýshynyń josyqsyz salýshylar tiziminde bar-joǵyn tekserý.

Osylaısha, elorda ákimdigi prokýratýramen birlesip júrgizgen monıtorıng kezinde úleskerlerdiń aqshasyn zańsyz alǵan 46 qurylys kompanııasyn anyqtady.