Elordada Qurmanǵazy eskertkishi aldynda kúı jarysy ótti

NUR-SULTAN. QazAqparat - Konstıtýtsııa kúnine oraı «Kúı atasy» atanǵan uly kompozıtor, dáýlesker dombyrashy, ónerimen ónege qaldyrǵan Qurmanǵazy Saǵyrbaıulynyń eskertkishi janynda mádenı-rýhanı shara ótti.

Onyń maqsaty – halqymyzdyń tól óneri retinde kúıdi dáriptep, uly kúıshiniń ushan-teńiz murasyn qaıta jańǵyrtyp, urpaqtan urpaqqa taratyp jáne olardy jastar arasynda nasıhattaý.

Bul shara qadirmendi qonaqtardyń Qurmanǵazy Saǵyrbaıulynyń eskertkishine gúl shoqtaryn qoıý rásiminen bastaldy.

Qoǵam qaıratkeri, «Kúı anasy» respýblıkalyq qorynyń jetekshisi Tólegen Qýanyshev sóz sóılep, 3 ret «Kúı jármeńkesi» ótkizilgenin jáne osy kúnge deıin arnaıy sheberlerge 185 dombyra jasatyp, elimizdiń túrli nysandaǵy óner mektepterine tegin taratylǵanyn aıtty.

Endi azamattardyń jáne aqsaqaldar alqasynyń qoldaýymen «Kúı atasy» atanǵan daýylpaz kúıshi-kompozıtor Qurmanǵazy babamyzdyń eskertkishi janynda 4-shi márte «Kúı jármeńkesi» ótkizilgeli turǵanyn habarlady.

Qazaqstannyń eńbek sińirgen óner qaıratkeri, kúılerdiń tarıhyn zertteýshi, professor Aıtjan Toqtaǵan óz sózinde Qurmanǵazynyń mektebi men shyǵarmashylyǵy, sondaı-aq mádenı murasynyń mańyzdylyǵy týraly maǵlumat berdi.

Belgili óner ıeleri Turar Álipbaev pen Anar Muzdahanova Qurmanǵazynyń birneshe kúıin oryndap, kórermenniń ystyq yqylasyna bólendi.

QR Mádenıet qaıratkeri, dırıjer, kompozıtor Nurlan Bekenov Aslan Asqaruly atty jas daryn ıesine aq jol tilep, dombyra syılady. Kúıshi babanyń eki kúıin tartyp, olardyń shyǵý tarıhyn baıandap berdi.

Aqyn, sazger Ábdiǵanı Bázilhanuly óziniń júrekjardy arnaýyn jetkizdi.

Qazaq ulttyq óner ýnıversıtetiniń 4-kýrs stýdenti Tileýles Nurlybek Halyq aqyny Hamıt Erǵalıevtiń Qurmanǵazyǵa arnalǵan poemasynan úzindi oqyp berdi.

Aqyn Aıbatyr Seıtaq óz kezeginde Qurmanǵazy Saǵyrbaıulyna arnalǵan «Uly dalanyń dúldúli» atty óleńin oqyp berdi.

Ádettegideı kúı saıysy ótkizildi. Oǵan kórermen arasynan úmitkerler qatysty.

Baq synaǵandarǵa qazylyq jasaǵandar atynan Qazaqstannyń eńbek sińirgen qaıratkeri, professor, kúıshi ustaz Orynbaı Dúısen shyǵarylǵan qorytyndyny jarııa etti.

Bas báıgege ıe bolyp, jeńimpaz atanǵan Dáýlet Ońǵarǵa úkili dombyra syıǵa tartyldy. Ózge júldegerlerge kitaptar tabys etildi.

Osy kúı keshin Nur-Sultan qalalyq qoǵamdyq keńesi, Esil aýdanynyń ákimdigi, Qazaq ulttyq óner ýnıversıteti jáne «Kúı anasy» respýblıkalyq qory uıymdastyrdy.