Elordada qurylys kompanııalary obekt aýmaǵyn úsh jyl boıy kógaldandyrýǵa mindetti
- Bıyl 170 qoǵamdyq jáne aýla keńistikterin abattandyrý jumystary aıaqtaldy. Onyń ishinde Ulytaý alleıasy, Máńgilik el, Táýelsizdik, Turan dańǵyldary, Qazaq eli alańy, Myńjyldyq alleıasynyń bir bóligi, Júrgenov alleıasyndaǵy skver, eski vokzal aýmaǵy men oǵan irgeles Gete jáne Birjan sal kósheleri, Jastar saıabaǵy, sondaı-aq «Kerýen» jáne «Han Shatyr» saýda ortalyqtarynyń janyndaǵy skverler abattandyrylyp, kógaldandyryldy. Sonymen qatar, Aqbulaq jaǵalaýy, Prezıdent saıabaǵy jáne Beıbitshilik pen kelisim saıabaǵy kiretin Esil ózeniniń boıyndaǵy saıabaqtar klasteri abattandyrylyp jatyr. Sondaı-aq, Jaǵalaý shaǵyn aýdanynda 18 gektar aýmaqty keshendi abattandyrdyq, - dedi elorda ákimi Jeńis Qasymbek elordanyń áleýmettik-ekonomıkalyq damýy týraly esep bere turyp.
Ákimniń esebinshe, bıyl qala men «jasyl beldeý» aýmaǵynda shamamen 1 mıllıon jasyl jelek otyrǵyzyldy. Olardyń ishinde elorda klımatyna beıimdelgen eýropalyq aǵash túrleri de bar.
- Qalany kógaldandyrý jarǵysy qabyldandy. Endi birde-bir qurylys salýshy dendroplandy iske asyrmaı jáne obekti aınalasyndaǵy jasyl jelekti úsh jyl boıy kútip-baptaý boıynsha mindetterdi ózine almaı, obektini tapsyra almaıdy, - deıdi ol.
Buǵan deıin Jeńis Qasymbek bıyl elordanyń jeke tabysy 1 trln teńgeden asqanyn aıtty.