Elordada «Quraq kórpeden» shyrsha ornatyldy

NUR-SULTAN. QazAqparat – Jańa jyl merekesi qarsańynda Nur-Sultan qalasynyń ortalyǵyna erekshe shyrsha qoıyldy. Qoldan jasalǵan shyrshany ázirleýge elimizben qatar shetel azamattary da belsendilik tanytty, dep habarlaıdy QazAqparat tilshisi.

«Búgin Nur-Sultan qalasynyń ortalyǵyna erekshe formattaǵy shyrsha ornatyldy. Bul meniń bala kúngi armanym. Bul jerde bir jaǵynan kóneden kele jatqan qolóner isine jan bitirsek, ekinshi jaǵynan tabıǵatqa janashyrlyq tanytyp, eko-shyrshany dáripteý. Taǵy bir erekshe aıtyp ótetin sát. Bul shyrshany jasap shyǵarýǵa elorda ǵana emes elimizdiń basqa da óńirlerinen azamattar úlesterin qosty. Atap aıtqanda, Almaty, Aqtóbe, Petropavl qalalarynan belsendiler qatysty. Olardyń jas erekshelikteri de ártúrli, kishkentaı baladan, 80-degi ájemizge deıin atlasysty. Sondaı-aq, bul jańa jyldyq syıdy ázirleýge Ózbekstan, Reseı azamattary, odan bólek keshe ǵana Afrıka azamaty bizdiń qatarymyzǵa qosylyp, qol ushyn sozyp jatyr»,- dedi «Quraq kórpeden» eko-shyrsha jasaý ıdeıasynyń avtory, áleýmettik kásipker Rahıma Muqysheva.

Onyń aıtýynsha, erekshe shyrshanyń bıiktigi 6 metr, quraqtyń uzyndyǵy 70 myń metr, ony jasaýǵa 200-den astam adam atsalysty.

«Quraq kórpeden shyrsha jasaý ıdeıasy týraly Instagram paraqshasynan bildim. Jańa jyl qarsańynda erekshe ıdeıa usynyp jatqan soń, men de óz úlesimdi qosaıyn dep sheshtim. Onyń ústine qolymnan toqý, is tigý keledi. Bul jerde quraq 20/20 sharshy santımetrdi quraıdy. Shyrshany jasaý kezinde quraq quraýdy men de úırengim keledi dep qatarymyzǵa qosylǵandar boldy. Keshe jumysty tolyǵymen aıaqtadyq, jalpy bul isti jaqsy bastama dep oılaımyn. Aldaǵy ýaqytta bul ıdeıa odan ári jalǵasyn tapsa durys bolar edi. Óıtkeni is toqý, tigý jáne quraq jasaý bizdiń dástúrimizde bar nárse. Jáne óskeleń urpaq úshin de jaqsy úlgi», - dedi eko-shyrshany jasaýǵa úles qosqan elorda turǵyny Záýre Ýálıqyzy.

Aıta ketsek, «Quraq kórpeden» jasalǵan erekshe shyrsha elordadaǵy «Báıterek» monýmentiniń janyna ornatyldy.