Elordada qupııa orynǵa esirtki jasyratyn apaly-sińliler ustaldy

NUR-SULTAN. QazAqparat – Jedel izdestirý is-sharalary barysynda elorda aýmaǵynda qupııa orynǵa sıntetıkalyq esirtki qaldyryp ketýmen aınalysatyn qylmystyq top ustaldy, dep habarlaıdy QazAqparat tilshisi.

Atap aıtqanda, Nur-Sultan qalalyq polıtsııa departamentiniń málimetinshe, Abylaı han dańǵyly boıynda 38 jáne 40 jastaǵy apaly-sińliler ustaldy. Áıelderdi jeke tintý barysynda salmaǵy shamamen 5 gramm bolatyn «skorost» sıntetıkalyq esirtki zaty tabyldy. Aqmola oblysynan kelgen apaly-sińlilerdiń Kravtsov kóshesi boıynda jalǵa alǵan páterin tintý barysynda tarazy jáne qupııa orynǵa qaldyryp ketýge daıyn 15 orama jáne 90-nan astam dozaǵa jetkilikti sıntetıkalyq esirtki tárkilendi. Atalǵan fakti boıynsha qylmystyq is qozǵaldy.

Osy rette qalalyq polıtsııa departamenti esirtki zattaryn zańsyz saqtaý jáne taratqany úshin jaýapkershilik bar ekendigin eskertedi.