Elordada kúnine 90-100 ata-ana balabaqsha kezegine turady

ASTANA. QazAqparat – Ótken jyly elordada balalardyń 80 paıyzy mektepte deıingi bilim berý uıymdarymen qamtyldy. Astana qalasy bilim basqarmasynyń basshysy Qasymhan Senǵazyevtiń málim etýinshe, bul baǵyttaǵy jumys jalǵasyp jatyr, dep habarlaıdy QazAqparat tilshisi.

«Búginde elordada 507 mektepke deıingi uıymda 67 730 bala tárbıe alyp jatyr. Ulttyq statıstıka bıýrosynyń derekteri boıynsha 2021 jylǵy 1 qańtardaǵy jaǵdaı boıynsha 6 jasqa deıingi balalardyń tabıǵı ósimi 23 448 jáne kóshi-qon esebi boıynsha 3 115 balany qurady. Qazir 23 746 elordalyq bala balabaqsha kezeginde tur. Halyq sanynyń ósýine baılanysty balabaqshaǵa suranys jyl saıyn artyp keledi. Kún saıyn balabaqsha kezegine 90-100 ótinish berilip, kezekke turady. Ótken jyldyń qorytyndysy boıynsha balalardyń 80 paıyzy balabaqshamen qamtyldy», - dedi Qasymhan Senǵazyev elorda máslıhatynyń otyrysynda.

Onyń aıtýynsha, balalardy mektepke deıingi tárbıemen qamtý baǵytyndaǵy jumys jalǵasyn tabady.

«Bıyl qańtar men sáýir aıy aralyǵynda 200 jekemenshik balabaqshaǵa 8 957 orynǵa memlekettik tapsyrys berildi. Jyldyń ekinshi jartysynda qalǵan 870 orynǵa konkýrs jarııalanyp, memlekettik tapsyrys oryndalady», - deıdi ol.