Elordada qudyq qaqpaqtaryna datchıkter ornatylyp jatyr
«Qaladaǵy júıeli problemalardyń biri – qudyq qaqpaqtary máselesi. Qala basshylyǵy osy rette qudyqtardyń ashylýy ǵana emes, olardyń qozǵalýyn tirkeıtin datchıkterdi testi rejımde synap jatyr. Aqyldy datchıkter qazirdiń ózinde jaýyn-shashyn sýyn qabyldaıtyn káriz júıeleriniń qudyqtaryna ornatylǵan», - dep habarlaıdy qala ákimdigi Instagram paraqshasynda.
Datchıkterdiń jumys qaǵıdaty úılesim júıesindegi ornyn programmalaýǵa negizdelgen. Úılesim júıesi 10 nemese odan joǵary gradýsqa qısaıǵan kezde sıgnal dabyl belgisin berip, ol týraly aqparattyq júıede, sonymen qatar Telegram mobıldi qosymshasynda habarlanady.
«Qudyqtyń qaqpaǵy urlanǵan jaǵdaıda aqparattyq júıe arqyly onyń qaıda aparylǵanyn bilýge bolady. Osylaısha qazirdiń ózinde bul júıe jemisin berdi. 2020 jyldyń 11 qyrkúıeginde shoıyn lıýktardy urlaǵandar ustaldy. Aqparattyq júıege sıgnal túsip, qaqpaqtardyń qozǵalys traektorııasy, aparylǵan oryny belgili boldy. Urlyq faktisi boıynsha Qylmystyq kodekstiń 188-baby 2-bóligi 1-tarmaǵy boıynsha sotqa deıingi tergeý bastaldy», - delingen habarlamada.
Eske sala ketsek qaqpaǵy urlanyp, qudyqtardyń ashyq qalýy – elordada ózekti máselelerdiń biri. Osydan birneshe jyl buryn №73 mektep lıtseıdiń 3 synyp oqýshysy, keıin №83 mektep-gımnazııasynyń 6 synyp oqýshysy qudyqqa qulap ketken bolatyn.