Elordada qoı sany 40 paıyzǵa ósti, Almatyda kerisinshe azaıǵan

ASTANA. QazAqparat - Qazaqstanda bıylǵy 1 maýsymdaǵy jaǵdaı boıynsha qoı sany - 25,9 mln. 2022 jyldyń qańtar-mamyr aralyǵymen salystyrǵanda mal basy 4,1% ósken, dep habarlaıdy QazAqparat ulttyq statbıýroǵa silteme jasap.

Qoıdyń kóbi Túrkistan oblysynda – 5,9 mln bas.

Odan keıin tizim basynda Jambyl jáne Almaty oblystary: 3,9 mln jáne 3,2 mln bas.

Qoı sany ásirese elordada qatty ósken – 39,4%-ǵa. Almatyda kerisinshe qoı basy 21,6% azaıǵan.

Aıta keteıik, qoıdyń 48% halyqtyń jekejaıynda, taǵy 47%-y jeke kásipkerler men sharýa qojalyqtarynyń, qalǵan 5% - sharýashylyq kásiporyndardyń qolynda.

Sonymen qatar bıylǵy 5 aıda eshki sany byltyrǵy sáıkes kezeńmen salystyrǵanda 1,7%-ǵa artyp, 3,2 mln bas boldy.