Elordada kóshpendiler ómirinen syr shertetin grafıkalyq kórme ashyldy
«Bıyldyqqa Nur-Sultan qalasynda ekinshi jeke kórmem ótip otyr. Alǵashqysy kóktemde ótti. Bul jolǵy kórme grafıka onyń ishinde lınogravıýraǵa arnalyp otyr. Atalǵan óner túri elimizde damý jaǵynan kenje qalǵan desem de bolady. Onyń sebebi - lınogravıýra uzaq ýaqyt pen qajyrly eńbekti qajet etedi. Sondaı-aq, shydamdylyq pen krevtıv kerek. Grafıkanyń osy túriniń múmkindikterin kórsetý jáne ony kópshilikke nasıhattaý maqsatynda búgingi kórmeni uıymdastyryp otyrmyz», - dedi kórme avtory Batýhan Baımen.
Kórmege 50 shaqty grafıkalyq týyndy qoıylǵan. Sol sııaqty avtor buǵan deıin Tashkent, Bishkek, Kıpr, Ystanbul ján Berlın qalasynda 11 ret jeke kórmesin ótkizgen.
«Búgingi kórmege 2019-2020 jyldary jasalǵan jańa jumystarym qoıylǵan. Mundaǵy týyndylar týraly qalyń jurt asa bile bermeıdi. Shynyn aıtý kerek, kórmege qoıylǵan kartınalardyń máni men syryn kelýshiler bir qaraǵannan túsine qoımaıdy. Shabytqa kelsek, kúni-túni sýret salýmen aınalysamyn dep aıta almaımyn. Maǵan ıdeıa kez kelgen ýaqytta keledi, serýendep júrgende, as iship otyrǵanda, keıbir ıdeıalardy ınternetten qaraımyn. Eń bastysy - tyń ıdeıa kelgende ony qaǵyp alý, ıaǵnı tyń ıdeıadan kóz jazyp qalmaý kerek. Ol saǵym sekildi, der kezinde ustap qalmasań, ol ıdeıa qaıtyp oralmaıdy», - deıdi ol.
Elorda jurtshylyǵy atalǵan kórmeni «Forte Kulanshi Artspace» galereıasynan (Dostyq kóshesi 8/1) dúısenbi-juma kúnderi saǵat 10:00-18:00 aralyǵynda tegin tamashalaı alady.
Búgin bastalǵan kórme 20 qarashaǵa deıin jalǵasady.
«Aldymen Batýhannyń jumysyn bizge poshta arqyly jiberdi. Sodan keıin biz onlaın tanystyq. Týyndylarǵa kelsek, jalpy grafıkanyń ishinde gravıýra - sýretshiler sırek aınalysatyn sala. Meni tańǵaldyrǵany - týyndylardyń keńdigi men maǵynasy. Avtor óz shyǵarmalary arqyly tutas qoǵam men ondaǵy áleýmettik máselelerdi kórsetip otyr. Bul týyndylardyń basty qundylyǵy - qoldyń jumysy. Oılap kórińiz, bir jumysty ázirleýge aptalap, keıde tipti aılap ýaqyt ketedi, al bul jerde 50 týyndy qoıylǵan», - deıdi KULANSHI zamanaýı óner ortalyǵynyń jetekshisi Láıla Mahat.