Elordada «Kórpe Fest» festıvali ótti
Іs-sharaǵa Premer-Mınıstrdiń orynbasary Eraly Toǵjanov, Eńbek jáne halyqty áleýmettik qorǵaý vıtse-mınıstri Rýslan Sákeev, Nur-Sultan qalasy ákiminiń orynbasary Berik Jákenov, jumyspen qamtý jáne áleýmettik qorǵaý basqarmasynyń basshysy Sáýle Nurǵojına qatysty.
Festıvalde sóz sóılegen vıtse-premer áıelderdiń qolónerge degen qyzyǵýshylyǵyna joǵary baǵa berdi.
«Analar sheshim qabyldasa bári oryndalady. Aıaq-qoly saý adam jumys istegisi kelmese túrli syltaý tabady. Únemi «joq» deıtin adamnyń qolynan eshteńe kelmeıdi. Ylǵı da jaqsy nárseni aıtý kerek, oǵan senip, alǵa umtylý kerek. Ózine senimdi adam ózgelerdiń de, eldiń de senimine ıe bolady. Jumys isteıtin árbir otbasy qashanda baqytty. Sizder jasaǵan zat ózgelerdiń úıine jylý ákeledi», – dedi Eraly Toǵjanov.
Vıtse-premer sondaı-aq Úkimette halyqtyń tabysyn arttyrý boıynsha baǵdarlama ázirlenip jatqanyn habarlady.
Festıval aıasynda kópbalaly analarǵa tigin jáne qoldanbaly óner boıynsha tegin oqytý sabaqtary ótti. Sheberlik sabaqtaryn ulttyq qolóner buıymdaryn shyǵaratyn etno-dızaıner, «Altyn sapa» Prezıdenttik syılyǵynyń laýreaty, «Qurmet» ordeniniń ıegeri Yrza Tursynzada ótkizdi.
Master-klass qatysýshylaryna qoldanbaly ónerdiń negizderi men qupııalary, óz bıznesin ashý tásilderi, ony tabys tabý úshin áleýmettik jelilerde júrgizý ádisi oqytyldy.
Festıval aıasynda atyraýlyq kásipkerler atynan is-sharaǵa qatysqan jasóspirim qyzdar men analarǵa 15 tigin mashınasy syıǵa tartyldy. Sondaı-aq, elordanyń Jumyspen qamtý jáne áleýmettik qorǵaý basqarmasynyń basshysy birqatar qatysýshylarǵa elorda ákimi Altaı Kólginovtiń atynan alǵys hattar tabys etti.
«Baqytty otbasy» jobasyna 6 jastan 78 jasqa deıingi názik jandylar qatysa alady. Óz kezeginde qatysýshylar elimizdiń tabysty áıelderimen bir qatarda bolýǵa umtylýy tıis», – dep atap ótti festıval uıymdastyrýshylary.