Elordada kópbalaly analarǵa altyn jáne kúmis alqalar tabys etildi

NUR-SULTAN. QazAqparat - Táýelsizdik merekesi qarsańynda «Baıqońyr» aýdany ákiminiń orynbasary Erlan Jaýlybaevtyń tóraǵalyǵymen aýdandaǵy kópbalaly analar saltanatty túrde «Altyn» jáne «Kúmis» alqalarmen marapattaldy, dep habarlaıdy QazAqparat ákimdiktiń saıtyna silteme jasap.

Táýelsizdik kúnine oraı astanalyq 6 jáne odan da kóp balasy bar analarǵa «Altyn» jáne «Kúmis» alqalar tabystaldy. Osylaısha, «Altyn alqa» belgisimen kópbalaly ana Gúljan Ospanbaeva marapattalsa, odan bólek 14 anaǵa «Kúmis alqa» belgisi saltanatty túrde berildi. Sonymen qatar, alqa ıegerleri arnaıy syılyqtarǵa da ıe boldy.

Іs-sharaǵa qatysqan qonaqtar arasynda kóp balaly analardyń jaqyn týystary da boldy. Qonaqqa kelgen aq jaýlyqty ájeler shashý shashyp, aq batalaryn berdi. Sondaı-aq, olar jas urpaqqa ózderiniń ómirlik ónegelerin aıtyp, qundy keńesterimen bólisti.