Elordada kóktaıǵaqqa baılanysty kommýnaldyq qyzmetter kúsheıtilgen rejımge kóshti

NUR-SULTAN. QazAqparat - Elordada jaýyn-shashynnan keıin kósheler men aýlalar kóktaıǵaq boldy. Kommýnaldyq qyzmetter kúsheıtilgen rejımde jumys istep jatyr, dep habarlaıdy QazAqparat qala ákiminiń baspasóz qyzmetine silteme jasap.

Qalada eskertý jarııalandy. Kommýnaldyq qyzmetter qardy tazalaý jumystaryn jalǵastyryp, kóktaıǵaqty boldyrmaý úshin taıǵaqqa qarsy qospany sebý jumystaryn júrgizip jatyr. 200 assenızatorlyq mashına sý jınaýǵa shyqty.

Qala ákimi Altaı Kólginov birneshe jerdi aralap, jumys barysyn baqylady. Qala ákiminiń tapsyrmasyna sáıkes qolaısyz aýa-raıy jaǵdaıynda jumys istegen kommýnaldyq qyzmetkerler syıaqy alatyn bolady.

26 aqpannan 27 aqpanǵa qaraǵan túni qar tazalaý jumystaryna 1300-ge jýyq arnaıy tehnıka men 1 myń jumysshy shyqty. Al 26 aqpanda 1625 birlik arnaıy tehnıka men 1,5 myńnan astam jol jumysshylary jumyldyryldy.

Barlyǵy 4 mln 800 myń tekshe metr qar shyǵaryldy (ótken jyly - 1 mln 900 myń tekshe metr qar).