Elordada kóktaıǵaq: bir táýliktiń ishinde 125 jol-kólik oqıǵasy tirkeldi

NUR-SULTAN. QazAqparat - Elordada bir táýlik ishinde 125 jol-kólik oqıǵasy tirkelgen, onyń ishinde 3 jaǵdaı zardap shegýshiler bar, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

Tańǵy saǵat 07.00 - den bastap 35 jol-kólik oqıǵasy oryn aldy.

Keshe, saǵat 20.00-de 36 jastaǵy «Shansıman» markaly avtokóliginiń júrgizýshi Táýelsizdik kóshesimen Qaldaıaqov kóshesine qaraı kele jatyp, kóktaıǵaqtyń saldarynan kólik tizginine ıe bola almaı, beton-armatýralyq qurylǵyǵa soqtyǵysty. Jol-kólik oqıǵasynda júrgizýshi zardap shekken joq.

Aýa-raıynyń qolaısyzdyǵyna jáne kóktaıǵaqtyń oryn alýyna baılanysty Nur-Sultan qalasynyń Polıtsııa departamenti júrgizýshilerge qozǵalys kezinde barynsha muqııat ári saq bolýdy, jyldamdyq rejımin, qaýipsiz ara qashyqtyqty, manevr jasaý jáne búıirlik ınterval qaǵıdasyn buljytpaı saqtaýdy eskertedi.

Dymqyl asfalt júrgizýshiler úshin - eń qaýipti bolyp tabylady. Joldyń tósenishi taıǵanaq, onyń ústine túngi qatqaqtar bastaldy. Mundaı jaǵdaılar kólik quraldarynyń tejeý jolynyń ulǵaıýyna ákep soqtyrady. Joldarda qaýipsiz qozǵalysty qamtamasyz etý maqsatynda elordalyq polıtsııa qyzmetkerleri avtokólik quraldarynyń ıelerine kólikteriniń jazǵy shınalaryn qysqy shınalarǵa aýystyrýdy usynady.

Sondaı-aq, jaıaý júrginshilerdiń de barynsha muqııat bolýyn eskertedi.