Elordada kókónis pen jemisti kún sáýlesi men topyraqsyz ósirý tehnologııasy jasalýda

NUR-SULTAN. QazAqparat - Elorda jylyjaılarynda ónimdilikti arttyrý maqsatynda agrotehnıkalyq zertteýler júrgizilýde, dep habarlaıdy QazAqparat tilshisi.

Ákimdiktiń resmı saıtynyń málimetinshe, S.Seıfýllın atyndaǵy Qazaq agrotehnıka ýnıversıtetiniń ǵalymdary Led system media kompanııasynyń óndiris alańynda kókónis pen jemisterdi kún sáýlesinsiz ósirý tehnologııasyn jasaýda.

Ósimdikter kún sáýlesin nanofosformen toltyrylǵan arnaıy jaryqdıodty shamdarmen almastyrady.

«Osy joba boıynsha dıplomdyq jumys jazdyq. Qazir ol boıynsha magıstrlik dıssertatsııa jazylýda. Kóshe shamdaryn shyǵaratyn Led system media kompanııasy óziniń sıpattamalary boıynsha kún sáýlesine jaqyn shamdardy synaqtan ótkizedi. Biz qazir kompanııa jylyjaıynda ósimdikter úshin kún sáýlesin osy shamdarmen tolyqtaı almastyrý jolyn izdeýdemiz. Biz qazirdiń ózinde nátıjege jaqyndap qaldyq», - deıdi aýyl sharýashylyǵy ǵylymdarynyń kandıdaty, Qazaq agrotehnıka ýnıversıtetiniń agronomııa fakýlteti aýyl jáne ósimdik sharýashylyǵy kafedrasynyń aǵa oqytýshysy Arysgúl Turlybekova.

Onyń aıtýynsha, bul ádis ósimdikterdi kún sáýlesi túspeıtin bólmede ósirýge múmkindik beredi. Soltústik aımaqtarda kún sáýlesiniń tapshylyǵy ásirese qysta aıqyn seziledi. Sáýle shashý spektri joǵary bolǵandyqtan, shamdar jemisterdiń ósýi men jetilýin tezdetedi. Olar energııa únemdeý úshin de barynsha tıimdi.

Sonymen qatar elorda jylyjaılarynda daqyldardy topyraqsyz ósirý tehnologııasy zerttelip jatyr.

«Olar gıdroponıkany paıdalanady, ıaǵnı kókónister men jemister tamshylatyp sýarý ádisimen arnaıy sýbstratta ósiriledi. Ol arqyly ósimdikter dárýmenmen baıytylady. Bul ádistiń artyqshylyqtary - aramshóp bolmaıdy jáne ósimdik aýrýlary az. Mundaı jylyjaılarda mıkroklımat retteledi. Bul - kókónis daqyldaryn ósirýdiń óte joǵary tehnologııalyq tásilderi», - dep túsindirdi Arysgúl Turlybekova.

Onyń aıtýynsha, osy ádispen alynǵan jemisterdiń sapasy jerdegi jylyjaıda ósirilgenderden kem túspeıdi. Alynǵan ónimniń hımııalyq quramy tekseriledi jáne barlyq qajetti standarttarǵa sáıkes keledi.

QATÝ jobalaryna agronomııa fakýlteti aýyl jáne ósimdik sharýashylyǵy kafedrasynyń stýdentteri de qatysady. Olarǵa jylyjaıda kókónis pen jemis ósirý boıynsha praktıkalyq sabaqtar ótkiziledi.

Stýdentter jańa tehnologııalarmen tanysady. Olarǵa mundaı sabaq úsh jyl boıy ótkiziledi.