Elordada «Kitap oqyp, rýhanı baı bol!» qalalyq baıqaýy ótip jatyr

NUR-SULTAN. QazAqparat - Nur-Sultan qalasy boıynsha «Rýhanı jańǵyrý» jobalyq keńsesi QR Ulttyq akademııalyq kitaphanasymen birlese uly oıshyl Abaıdyń 175 jyldyq mereıtoıyn toılaý aıasynda «Kitap oqyp, rýhanı baı bol!» qalalyq baıqaýy ótýde, dep habarlaıdy QazAqparat tilshisi.

Abaıdyń shyǵarmalaryn keńinen taratýdy maqsat etken baıqaý ІІ kezeńnen turady.

«Bul - qalalyq, oblystyq kólemde ótip jatqan aýqymdy joba. Baıqaýda Abaıdyń ómiri men shyǵarmashylyǵyna qatysty suraqtar qoıylady. Qatysýshylardyń jas erekshelikterine talap qoıylǵan joq. Eń kishkentaı qatysýshy - úshinshi synyp oqýshysy bolsa, eń úlkeni - zeınetker», - deıdi ádilqazy múshesi Aıshat Jýasbaeva.

Atalǵan baıqaýdyń І kezeńinde kitapsúıer qaýym jeltoqsan-qańtar aılary aralyǵynda ózderiniń súıikti kitaptarynan úzindiler oqyp, áleýmettik jelilerge júktedi. Otandyq jáne sheteldik aqyn, jazýshylardyń týyndylaryn oqyp, júzden júırik shyqqan 10 qatysýshy ekinshi kezeńge joldama alǵan.

«Abaı - ulttyń pasporty. Abaıdyń aıtqan sózderi áli kúnge deıin ózektiligin joǵaltqan joq. Prezıdentimiz Qasym-Jomart Toqaev jazǵan «Abaı jáne HHІ ǵasyr» maqalasynda Abaıdyń 175 jyldyǵyna arnalǵan sharalar bıyl ǵana emes, «Rýhanı jańǵyrý» aıasynda qaıta-qaıta oqyp, zertteýimiz kerek ekenin aıtty. Rýhanı jańǵyrý degen - bir nárse oılap tabý emes, bar qundylyqtarymyzdy ulttyń rýhanı sanasynda qaıta jańǵyrtý. Bilim, óner, mýzyka ultqa bólinbeıdi. Abaı álem alyptarymen qatar turatyn tulǵa, demek sizder álemdik deńgeıdegi tulǵany oqyp jatyrsyzdar», - deıdi L.Gýmılev atyndaǵy Eýrazııalyq Ulttyq ýnıversıtetiniń professory, fılologııa ǵylymdarynyń doktory Gúlnar Muratova.

ІІ kezeńde baıqaý qatysýshylary Abaı Qunanbaıulynyń óneri men shyǵarmashylyǵyna qatysty jasalǵan vıktorınada baq synasatyn bolady.