Elordada keń aýqymdy «Densaýlyq festıvali» ótedi

NUR-SULTAN. QazAqparat - 7 qyrkúıek kúni saǵat 12:00-de «Densaýlyq festıvali» naýqany bastalady. Qalanyń árbir turǵyny qyzyqty sporttyq sharaǵa qatysa alady, dep habarlaıdy QazAqparat.

Sharanyń maqsaty - qoǵamnyń, qalyń buqaranyń nazaryn belsendi ómir saltyna aýdarý, ártúrli jastaǵy turǵyndardyń dene belsendiliginiń densaýlyqqa tıgizer paıdasy týraly málimet berý, sonymen qatar DDU sarapshylarynyń usynystaryna sáıkes, kúndelikti jetkilikti fızıkalyq belsendilik daǵdylaryn damytý.

Aktsııa aıasynda «Densaýlyq qalashyǵy» qurylady, onda kez kelgen adam flıýorografııadan ótip, salmaǵyn, boıyn, qan qysymyn, holesterındi jáne qandaǵy qant deńgeıin ólsheı alady. MÁMS, skrınıng jáne taǵy basqa máseleler boıynsha mamandardan keńes alýǵa bolady.

Kúni boıy elorda turǵyndary úshin kontserttik baǵdarlama, bı, fıtnes jattyǵýlary ótedi, sonymen qosa lotereıa oınatylady.

Djıý-djıtsý stılindegi kúres, skandınavııalyq serýendeý boıynsha master-klass uıymdastyrylady. Sonymen qatar, Ulttyq shuǵyl medıtsınany úılestirý ortalyǵynyń mamandary tótenshe jaǵdaılar týraly sheberlik sabaǵyn ótkizedi.

Іs-sharany Nur-Sultan qalasynyń ákimdigi, Nur sultan qalasynyń qoǵamdyq densaýlyq saqtaý basqarmasy jáne salaýatty ómir saltyn qalyptastyrý ortalyǵy uıymdastyryp otyr.